భారత్​ నిరసనల మధ్యే 'గిల్గిత్​-బాల్టిస్థాన్​' ఎన్నికలు

గిల్గిత్​-బాల్టిస్థాన్​ మూడో శాసనసభ ఎన్నికలు అదివారం జరిగాయి. కొవిడ్​ నిబంధనల మధ్య కట్టుదిట్టంగా పోలింగ్​ జరిగింది. అయితే.. భారత భూభాగమైన పాక్​ ఆక్రమిత కశ్మీర్​పై పాక్​ చర్యలు తీసుకోవడాన్ని తీవ్రంగా వ్యతిరేకించింది భారత్​.

భారత్​ నిరసనల మధ్య పాకిస్థాన్​​ ఆక్రమిత భూభాగమైన గిల్గిత్​- బాల్టిస్థాన్​లో అసెంబ్లీ ఎన్నికలు ముగిశాయి. కరోనా మార్గదర్శకాలను పాటిస్తూ.. ప్రజలు తమ ఓటుహక్కును వినియోగించుకున్నారు.

ఈ ప్రాంతంలో ఎన్నికలు జరపాలన్న పాక్​ నిర్ణయాన్ని తీవ్రంగా వ్యతిరేకిస్తోంది భారత్​. కశ్మీర్​ భూభాగంలో దాయాది దేశం చర్యలు తీసుకోవడానికి ఎలాంటి ఆధారాలు లేవంటూ.. తీవ్రస్థాయిలో నిరసన వ్యక్తం చేసింది.

కట్టుదిట్టమైన భద్రతా చర్యల నడుమ ఆదివారం ఉదయం 8 గంటలకు ప్రారంభమైన ఓటింగ్​.. సాయంత్రం 5గంటలకు ముగిసింది. ఎలాంటి అంతరాయం కలుగకుండా సాగింది ఈ పోలింగ్​. ఓట్ల లెక్కింపు ప్రాంభమవ్వగా.. సోమవారం ఫలితాలు వెలువడనున్నాయి.

23 స్థానాల్లో 330 మంది పోటీ..

2010లో రాజకీయ సంస్కరణల అనంతరం.. ఆ ప్రాంతంలో మూడోసారి శాసనసభ ఎన్నికలు జరిగాయి. మొత్తం 24 అసెంబ్లీ స్థానాల్లో ఎన్నికలు జరగాల్సి ఉండగా.. 23 స్థానాల్లో మాత్రమే పోలింగ్​ నిర్వహించారు అధికారులు. ఇందులో నలుగురు మహిళలు సహా.. మొత్తం 330 మంది అభ్యర్థులు పోటీ చేసినట్టు సమాచారం. మొత్తం 1,141 పోలింగ్​ కేంద్రాల్లో 15వేల మంది భద్రతా సిబ్బంది మోహరించారు.

ఇదీ చదవండి:గిల్గిత్​-బాల్టిస్థాన్​కు రాష్ట్ర హోదా ప్రకటించిన పాక్​!