ఇండోనేషియాలో భారీ భూకంపం- 20 మంది మృతి

ఇండోనేషియా మలుకు రాష్ట్రంలోని అంబన్​ నగరంలో భారీ భూకంపం సంభవించింది. ఈ దుర్ఘటనలో 20 మంది మృతి చెందారు. పలువురు తీవ్రంగా గాయపడ్డారు. భూకంపం ధాటికి పలు భవనాలు కుప్పకూలాయి. శిథిలాల కింద చిక్కుకున్న వారి కోసం సహాయక చర్యలు ముమ్మరం చేశారు అధికారులు.

ఇండోనేషియాను మరోమారు భారీ భూకంపం కుదిపేసింది. మలుకు రాష్ట్రంలోని అంబన్​ నగరంలో గురువారం 6.5 తీవ్రతతో భూమి కంపించింది. నగరంలోని పలు ప్రాంతాల్లో భవనాలు కుప్పకూలాయి. కొండచరియలు విరిగిపడ్డాయి. ఈ విపత్తు కారణంగా 20 మంది ప్రాణాలు కోల్పోయారు.

శిథిలాల కింద చిక్కుకున్నవారి కోసం సహాయక చర్యలు ముమ్మరం చేశారు అధికారులు. క్షతగాత్రులను సమీప ఆస్పత్రులకు తరలించారు. కూలిన భవనాల వద్ద తాత్కాలిక శిబిరాలను ఏర్పాటు చేసి ఆశ్రయం కల్పించారు.

అంబన్​ నగరానికి ఈశాన్య దిశగా సుమారు 37 కిలోమీటర్ల దూరంలో 29 కిలోమీటర్ల లోతున భూకంపం కేంద్రీకృతమై ఉన్నట్లు అమెరికా జియోలాజికల్​ సర్వే తెలిపింది.

అంబన్ నగరంతోపాటు చుట్టు పక్కల ప్రాంతాల్లోనూ భూకంపం ప్రభావం చూపినట్లు విపత్తు నిర్వహణ అధికారులు తెలిపారు.

ఇదీ చూడండి: కశ్మీర్​పై ట్రంప్​ది మళ్లీ అదే మాట... తోసిపుచ్చిన భారత్