ప్రపంచ దేశాలు కరోనా కోరల్లో చిక్కుకొని విలవిల్లాడుతున్నాయి. ఈ పరిస్థితుల్లో కీలక ప్రకటన విడుదల చేసింది ఫిజీ ద్వీపం. తమది కరోనా రహిత దేశమని ప్రకటించుకుంది. వైరస్ బారిన వారంతా కోలుకున్నట్లు అక్కడి ఆరోగ్య శాఖ ప్రకటన విడుదల చేసింది. ప్రాణాంతక వైరస్ వ్యాప్తిని నివారించడానికి చాలా శ్రమించినట్లు స్పష్టం చేసింది.
"కరోనా వ్యాప్తిని నివారించడానికి అందరం కలిసికట్టుగా పని చేస్తున్నాం. ఏ స్థాయిలోనూ మా ప్రయత్నాలు విరమించుకోకుండా దేశానికి భరోసా ఇవ్వాలనుకుంటున్నాం. సాధ్యమైనంత వరకు అప్రమత్తంగా వ్యవహరిస్తూ కొవిడ్-19పై విజయం సాధిస్తాం."
-ఇఫెరీమి వాకైనాబేటే, ఫిజీ ఆరోగ్యశాఖ మంత్రి
92శాతం జనాభాకు పరీక్షలు..
ఇప్పటివరకు 2,000 మందికి పైగా వైరస్ పరీక్షలు చేయించినట్లు వెల్లడించారు ఇఫెరీమి. దేశ జనాభాలో 92శాతం మందికి కరోనా పరీక్షలు నిర్వహించామని స్పష్టం చేశారు. ప్రస్తుతం 100మంది క్వారంటైన్లో ఉన్నట్లు చెప్పారు.
వైరస్ మరణాలు జీరో!
ఇప్పటివరకు దేశంలో ఒక్క కరోనా మరణం సంభవించలేదని ఆ దేశ ప్రధాని ఒరెక్ బైనిమారామా స్పష్టం చేశారు. కరోనా బారిన పడిన 18మంది కోలుకున్నారని తెలిపారు.
ఫిజీలో మార్చి 19న తొలి వైరస్ కేసు నమోదు అయ్యింది. అప్పటి నుంచి కొవిడ్-19 నివారణకు భౌతిక దూరం, సమావేశాలపై కఠిన ఆంక్షలు విధించింది అక్కడి అధికార యంత్రాంగం. ఫలితంగా కరోనాపై విజయం సాధించినట్లు ప్రభుత్వం ప్రకటించింది.
ఇదీ చూడండి:ట్వీట్ బ్లాక్తో ట్రంప్కు మళ్లీ షాక్
