చైనా రక్షణ మంత్రితో రాజ్​నాథ్​ సింగ్​ భేటీ

21:45 September 04

చైనా రక్షణ మంత్రితో రాజ్​నాథ్​ సింగ్​ భేటీ

చైనా రక్షణ మంత్రి వీ ఫెంగీతో భారత రక్షణ మంత్రి రాజ్​నాథ్​ మాస్కోలో భేటీ అయ్యారు. షాంఘై సహకార సంస్థ (ఎస్​సీఓ) సభ్య దేశాల రక్షణ మంత్రుల సదస్సు కోసం మాస్కో వెళ్లారు రాజ్​నాథ్​. ఇదే వేదికగా ఫెంగీతో సమావేశమయ్యారు. ఇటీవల పాంగాంగ్​ తీరం వద్ద నెలకొన్న ఉద్రిక్త పరిస్థితులపై ఇరువురు చర్చించినట్లు తెలుస్తోంది.

సమావేశంలో పాల్గొన్న భారత బృందంలో రక్షణ కార్యదర్శి అజయ్​ కుమార్​, రష్యాలో భారత రాయబారి డీబీ వెంకటేశ్ వర్మ ఉన్నారు. భారత కాలమానం ప్రకారం శుక్రవారం రాత్రి 9.30 గంటలకు మాస్కోలో ప్రముఖ హోటల్​లో ఈ భేటీ జరిగినట్లు సమాచారం. 

అత్యున్నత భేటీ..

భారత్​- చైనా మధ్య సరిహద్దు ఉద్రిక్తతలు మొదలైన నాటి నుంచి తొలి అత్యున్నత భేటీ ఇదే. ఇంతకుముందు విదేశాంగ మంత్రి జైశంకర్​, చైనా తరఫున వాంగ్​ యీ ఫోన్​లో సంభాషించారు.

మూడు రోజుల పర్యటనలో భాగంగా రష్యాకు వెళ్లారు రాజ్​నాథ్​. ఎస్​సీఓ సదస్సుతో పాటు రష్యాతో ద్వైపాక్షిక సంబంధాలపై చర్చించారు. అయితే.. రాజ్​నాథ్​ షెడ్యూల్​లో చైనా రక్షణ మంత్రితో భేటీ లేదు.