ఈ మాస్కులను చూస్తే ఔరా అనాల్సిందే!

కొవిడ్​ విజృంభణతో మాస్కులకు అమాంతం డిమాండ్​ పెరిగిపోయింది. చిన్నా పెద్దా తేడాలేకుండా ప్రతిఒక్కరూ మాస్క్​లు ధరిస్తున్నారు. ఈ తరుణంలో వినూత్నంగా మాస్క్​లను తయారు చేస్తూ.. అందరి దృష్టినీ ఆకర్శిస్తున్నాడో కాస్ట్యూమ్​ డిజైనర్​. ఒక్కో మాస్క్​ ఒక ప్రత్యేకతను చాటుకునేలా అందంగా తీర్చిదిద్దుతున్నాడు. ఈ మాస్కులు విశేషంగా చూపరులను ఆకట్టుకుంటున్నాయి.

కరోనా నేపథ్యంలో మాస్కులకు ఒక్కసారిగా ప్రాధాన్యం ఏర్పడింది. అయితే 'మాస్కులందు నేను చేసిన మాస్కులు వేరయా' అని నిరూపిస్తున్నాడు హాంకాంగ్​కు చెందిన ఓ కాస్ట్యూమ్​ డిజైనర్​. వివిధ రకాల్లో ఎడ్మండ్​ కాక్​ తయారుచేసిన మాస్కులిప్పుడు విశేషంగా చూపరులను ఆకట్టుకుంటున్నాయి.

జ్యువెల్లరీ టైప్​ మాస్క్​

వృత్తిరీత్యా థియేటర్​ కాస్ట్యూమ్​ డిజైనర్​, నటుడైన 50 ఏళ్ల ఎడ్మండ్​ కాక్​కు ఇటీవల వైరస్​ సోకింది. అయినా తనలో సృజనాత్మకత ఏ మాత్రం తగ్గలేదని నిరూపిస్తూ.. కొత్తరకం మాస్క్​లను తయారుచేసి ఇన్​స్టాలో పోస్ట్​ చేయగా, సోషల్​ మీడియాలో విస్తృతంగా వైరల్​ అయ్యాయి.

గిఫ్ట్ ప్యాక్​టైప్​ మాస్క్​

రకరకాల మాస్క్​లు..

ఎడ్మండ్​ తయారుచేసిన మాస్కులలో వేటికవే ప్రత్యేకతను చాటుకొంటున్నాయి. ఒకటి పర్యావరణానికి హాని చేయకూడదని సూచిస్తే, సీసీటీవీ కెమెరాలతో రూపొందించిన ఇంకొక మాస్క్ హాంకాంగ్​లో ప్రస్తుతం నెలకొన్న పరిస్థితులను వివరిస్తుంది. త్రీడీ విజువలైజేషన్​తో కూడిన మరో మాస్క్​.. ప్రస్తుత తరం ఆరోగ్య పరిస్థితులను ప్రతిబింబిస్తుంది. ఇలా వేటికవే ప్రత్యేక సందేశాన్నిస్తున్నాయి.

సీసీటీవీ కెమెరాలతో తయారైన మాస్క్​

సాధారణ వస్తువులతోనే..

అయితే ఈ మాస్కుల తయారీకి ఎలాంటి ప్రత్యేక మెటీరియల్​ను వాడలేదంటున్నాడు ఎడ్మండ్. రోజూ మనం ఉపయోగించే సాధారణ వస్తువులతో పాటు.. మిగిలిపోయిన కాస్ట్యూమ్​ డిజైన్ కటింగ్స్​తో ఇలా చేశానంటున్నాడు​.

'ఎలాంటి కళ అయినా మనం రోజూ చేసే పనులనుంచే ఉద్భవించిందని నేను భావిస్తాను. కరోనా వైరస్​ కారణంగానే నేనీ ఫేస్​ మాస్కులు తయారు చేయగలుగుతున్నాను. వైరస్​కు సంబంధించిన అనేక చిత్రాలను చూశాక.. ఇలా విభిన్నంగా మాస్కులు తయారుచేయొచ్చు కదా అనిపించింది. అదే ఆలోచనతో ఈ కొత్తరకం మాస్కులకు తెరలేపాను.'

- ఎడ్మండ్​ కాక్​, థియేటర్​ కాస్ట్యూమ్​ డిజైనర్​

ఇదీ చదవండి:ప్రపంచంలోనే ఖరీదైన మాస్క్​.. ధరెంతో తెలుసా?