కరోనా సోకిన వ్యక్తిలో ప్రాథమిక లక్షణాలు కనిపించడానికి 2, 3 రోజుల ముందు నుంచే వైరస్ ఇతరులకు వ్యాప్తి చెందుతుందని ఓ అధ్యయనం తేల్చింది. వైరస్ సోకిన తర్వాత 7 రోజుల ఇంక్యుబేషన్ కాలం ఉంటుందని, ఆ తర్వాత ప్రాథమిక లక్షణాలు కనిపిస్తాయని గుర్తించారు హాంకాంగ్ పరిశోధకులు. ఇందుకు సంబంధించిన పరిశోధన పత్రాన్ని నేచర్ మెడిసిన్ పత్రికలో ప్రచురించారు.
ఈ అధ్యయనం ప్రకారం కరోనా వైరస్ సంక్రమణ, వ్యాధి వ్యాప్తి చెందే మధ్య కాలం అత్యంత కీలకమని చెప్పారు హాంకాంగ్ విశ్వవిద్యాలయ పరిశోధకులు. వైరస్ తొలి దశ లక్షణాలు కనిపించిన వెంటనే చికిత్స అందిస్తే మహమ్మారిని కట్టడి చేయవచ్చని నివేదించారు.
414 నమూనాలపై అధ్యయనం
ఈ అధ్యయనం కోసం చైనాలోని గ్వాంగ్జౌ పీపుల్స్ ఆసుపత్రిలో చేరిన 94 మందిపై పరిశోధన చేశారు. లక్షణాలు కనిపించినప్పటి నుంచి 32 రోజుల వరకు వారి నోటి స్రావాలను సేకరించి పరీక్షించారు. మొత్తం 414 నమూనాలపై అధ్యయనం చేసినట్లు నివేదికలో పేర్కొన్నారు.
వైరస్ సోకిన తర్వాత లక్షణాలు కనిపించటానికి 7 రోజుల సమయం పడుతుందని గుర్తించారు. ప్రాథమిక లక్షణాలు బయటపడక ముందు 2,3 రోజుల నుంచే ఇతరులకు వైరస్ సంక్రమించే అవకాశం ఉందని తెలిపారు.
శరీరంలో వైరస్ తీవ్రత పెరగడానికి 7 రోజుల సమయం పడుతుందని గుర్తించారు. వ్యాధి తొలి దశ లక్షణాలు బయటపడిన వెంటనే చికిత్స అందించిన వారిలో 44 శాతం మంది వేగంగా కోలుకున్నట్లు వెల్లడించారు.
