భారత్కు కరోనా మహమ్మారి అసలు ముప్పు ఇంకా తొలగిపోలేదని ప్రపంచ ఆరోగ్య సంస్థ(డబ్ల్యూహెచ్వో) నిపుణులు హెచ్చరిస్తున్నారు. వైరస్ తీవ్ర రూపం దాల్చనప్పటికీ లాక్డౌన్ ఆంక్షలు ఇప్పుడు సడిలిస్తున్న కారణంగా కేసుల సంఖ్య మరింత పెరిగే ప్రమాదం ఉందని స్పష్టం చేశారు. బంగ్లాదేశ్, పాకిస్థాన్ వంటి దక్షిణాసియా దేశాల్లోనూ ఇదే పరిస్థితి ఉందన్నారు.
భారత్లో కరోనా కేసుల రెట్టింపు సమయం 3 వారాలుగా ఉందని తెలిపారు ప్రపంచ ఆరోగ్య సంస్థ ఎమర్జెన్సీ ప్రోగ్రామ్ ఎక్జిక్యూటివ్ డైరెక్టర్ మైకేల్ ర్యాన్. ప్రభుత్వం చేపట్టిన లాక్డౌన్ వంటి చర్యల కారణంగా వైరస్ వ్యాప్తి కట్టడి అయినట్లు పేర్కొన్నారు. దేశంలోని పట్టణ, గ్రామీణ ప్రాంతాల్లో వైరస్ వ్యాప్తి భిన్నంగా ఉందన్నారు.
ఇప్పుడు లాక్డౌన్ ఆంక్షలు ఎత్తివేశాక అన్ని దేశాల్లోనూ వైరస్ మళ్లీ విజృంభించే అవకాశాలు ఉన్నాయని ర్యాన్ అన్నారు. భారత్లో వలస కార్మికులు, పట్టణ ప్రాంతాల్లో అధిక జనసాంద్రత వంటి ప్రధాన సమస్యలున్నట్లు చెప్పారు.
కరోనా కేసులలో ఇటలీని దాటేసి ప్రస్తుతం ఆరో స్థానంలో ఉంది భారత్. 2 లక్షల 36 వేలకు పైగా పాజిటివ్ కేసులు నమోదయ్యాయి. 6 వేల 600 మందికిపైగా ప్రాణాలు కోల్పోయారు. ఈ సంఖ్య ఎక్కువే అయినప్పటికీ దేశ జనాభాతో పోల్చి చూస్తే తక్కువేనని డబ్ల్యూహెచ్వో సీనియర్ శాస్త్రవేత్త సౌమ్య స్వామినాథన్ చెప్పారు. లాక్డౌన్ ఆంక్షలు ఎత్తివేసిన కారణంగా మరింత అప్రమత్తంగా ఉండాలని, మాస్కులు ధరించడం, భౌతిక దూరం వంటి జాగ్రత్తలు తప్పనిసరిగా పాటించాలని సూచించారు. వ్యాపార సంస్థలు, కార్యాలయాలు తెరుచుకున్న నేపథ్యంలో కనీస ప్రమాణాలు పాటించేలా చూడాలన్నారు.
