ప్రపంచ సంక్షోభం మధ్య అమెరికా-చైనా 'ఆరోగ్య' యుద్ధం

డబ్ల్యూహెచ్​ఓకు నిధులను నిలిపివేస్తూ ట్రంప్​ తీసుకున్న నిర్ణయంపై మాటల యుద్ధం నెలకొంది. చైనాపై అమెరికా మండిపడగా.. కరోనా విషయంలో జిన్​పింగ్​ ప్రభుత్వం సహకరించలేదని అగ్రరాజ్యం ఆరోపించింది. గొడవలకు ఇది సమయం కాదని, ఐకమత్యంతో ఉండాలని ఇతర దేశాలు పిలుపునిచ్చాయి.

కరోనా వైరస్​ మహమ్మారి వల్ల ఓ వైపు ప్రజల ప్రాణాలు గాల్లో కలిసిపోతుంటే.. ప్రపంచ దేశాల అగ్రనేతలు మాటల యుద్ధంలో మునిగిపోయారు. తాజాగా అమెరికా అధ్యక్షుడు డొనాల్డ్​ ట్రంప్​ ఓ అడుగు ముందుకేసి.. ప్రపంచ ఆరోగ్య సంస్థ(డబ్ల్యూహెచ్​ఓ)కు ఇవ్వాల్సిన నిధులను తక్షణమే నిలిపివేస్తున్నట్టు ప్రకటించారు. కరోనా మహమ్మారి ముప్పుపై ప్రపంచాన్ని హెచ్చరించడంలో డబ్ల్యూహెచ్​ఓ విఫలమైందని ఆరోపిస్తూ.. ట్రంప్​ ఈ నిర్ణయం తీసుకున్నారు. తొలినాళ్లలో వైరస్‌ వ్యాప్తిని డబ్ల్యూహెచ్‌ఓ కావాలనే కప్పిపుచ్చిందన్నది ఆయన ప్రధాన ఆరోపణ.

కరోనాను ప్రపంచ మహమ్మారిగా ప్రకటించడానికి డబ్ల్యూహెచ్​ఓ చాలా సమయం తీసుకుందని అగ్రరాజ్య విదేశాంగమంత్రి మైక్​ పాంపియో మండిపడ్డారు. అదే సమయంలో వైరస్​ తొలినాళ్లల్లో అమెరికాకు చైనా సహకరించలేదని ఆరోపించారు. ఈ నేపథ్యంలో చైనా వుహాన్​లోని ఓ అనుమానాస్పద ల్యాబ్​ను ప్రస్తావించారు.

"అక్కడ(వుహాన్​)లో ఓ ల్యాబ్​ ఉందని తెలుసు. అక్కడి మార్కెట్ల గురించి తెలుసు. వుహాన్​ నుంచే వైరస్​ పుట్టుకొచ్చిందనీ తెలుసు. వీటిని కిలిపితే ఎన్నో అనుమానాలు తలెత్తుతాయి. వీటన్నిటికి చైనా జవాబు చెప్పాలి."

- మైక్​ పాంపియో, అమెరికా విదేశాంగమంత్రి.

ట్రంప్​ నిర్ణయంపై ఆగ్రహం...

ట్రంప్​ నిర్ణయంపై చైనా తీవ్ర స్థాయిలో మండిపడింది. వైరస్​ కట్టడిలో డబ్ల్యూహెచ్​ఓ కీలక పాత్ర పోషిస్తోందని చైనా విదేశాంగశాఖ ప్రతినిధి జాఓ లిజియన్​ పేర్కొన్నారు.

"ప్రపంచ ఆరోగ్య సంక్షోభాన్ని అరికట్టడానికి డబ్ల్యూహెచ్​ఓ తీవ్రంగా శ్రమిస్తోంది. ముఖ్యంగా కరోనాపై పోరులో ప్రపంచ ఆరోగ్య సంస్థ స్థానం భర్తీ చేయలేనిది. అలాంటిది.. అమెరికా నిర్ణయం డబ్ల్యూహెచ్​ఓపై చాలా ప్రభావం చూపనుంది. ఇది ప్రపంచ దేశాలతో పాటు అమెరికాకు కూడా నష్టమే. డబ్ల్యూహెచ్​ఓకు మద్దతుగా నిలిచి అమెరికా తన బాధ్యతలను నిర్వర్తించాలని విజ్ఞప్తి చేస్తున్నాం."

-- జాఓ లిజియన్​, చైనా విదేశాంగశాఖ ప్రతినిధి.

అయితే డబ్ల్యూహెచ్​ఓకు సహాయం చేసేందుకు మరిన్ని నిధులు విడుదల చేసే అంశాన్ని పరిశీలిస్తున్నట్టు పేర్కొన్నారు జాఓ.

మరోవైపు ట్రంప్​ నిర్ణయాన్ని ఐరోపా సమాఖ్య తప్పుపట్టింది. ఇలాంటి గడ్డు పరిస్థితుల్లో నిధులను నిలిపివేయడానికి ట్రంప్​ వద్ద ఎలాంటి కారణాలు ఉండవని తెలిపింది. ఐకమత్యంగా ఉంటూ ముందుకు సాగాలని పిలుపునిచ్చింది.