వాడకుండా ఉన్న అపార్ట్‌మెంటులోని బాత్రూముల్లో వైరస్ ఆనవాళ్లను గుర్తించినట్లు తాజా అధ్యయనం వెల్లడించింది. చాలాకాలంగా ఖాళీగా ఉన్న ఇంట్లోని సింక్, ట్యాప్, షవర్ హ్యాండిల్ పై వైరస్‌ను గుర్తించినట్లు చైనీస్‌ సెంటర్‌ ఫర్‌ డిసీజ్‌ కంట్రోల్ అండ్ ప్రివెన్షన్‌కు చెందిన పరిశోధకులు వెల్లడించారు. ఈ విషయాన్ని బ్లూమ్‌బర్గ్‌ నివేదించింది.
అధ్యయనం ఏమంటోందంటే.?
అధ్యయనం ప్రకారం.. ఖాళీగా ఉన్న అపార్ట్‌మెంట్‌ కింద ఇంట్లో ఉండేవారు కరోనా వైరస్ బారిన పడ్డారు. ఆ తరవాత వారం రోజులకు ఖాళీగా ఉన్న ఇంట్లో వైరస్ ఆనవాళ్లను పరిశోధకులు గుర్తించారు. టాయిలెట్ ఫ్లష్ వేగానికి వైరస్ పైపుల ద్వారా ఆ ఇంట్లోకి చేరినట్లు 'యాన్‌ ఆన్‌సైట్‌ స్టిమ్యులేషన్ ఎక్స్‌పెరిమెంట్' ద్వారా శాస్త్రవేత్తలు గుర్తించారు.
వైరస్ సోకిన వ్యక్తి మలంలో వైరస్ తీవ్రత అధికంగా ఉంటుందని, ఇది ఇతర అపార్ట్‌మెంట్లకు చేరి, గాలి ద్వారా వ్యాప్తి చెందుతుందని తెలిపారు. బాత్రూమ్‌ల వాడకం అత్యంత అవసరమని, అయితే.. వాటిని సరిగా వినియోగించకపోతే గాలి బిందువుల ద్వారా వైరస్ వ్యాపిస్తుందని వెల్లడించారు. ఆసుపత్రుల్లో ఈ ప్రమాదం ఎక్కువగా ఉంటుందన్నారు. ప్లషింగ్ వల్ల ఇళ్లల్లో వైరస్ పైభాగానికి ప్రయాణించే అవకాశం ఉందని తెలిపారు. నీటి సదుపాయం సరిగా లేని దగ్గర కూడా ఇలాంటి పరిస్థితులు తలెత్తే అవకాశం ఉందని వివరించారు.
ఇదీ చదవండి:మహిళల్లో కరోనా ప్రభావం తక్కువ.. కారణం అదే!
