చైనాలో 2,943కు చేరుకున్న కరోనా మృతులు

కరోనా వైరస్​తో చైనాలో సోమవారం 31 మంది మరణించారు. దీంతో ఆ దేశంలో మృతుల సంఖ్య 2,943కు చేరింది. ప్రపంచ వ్యాప్తంగా 3,056 మంది కరోనా కాటుకు బలైనట్లు ప్రకటించింది ప్రపంచ ఆరోగ్య సంస్థ.

చైనాలో కరోనా వైరస్​తో మృతి చెందేవారి సంఖ్య రోజురోజుకూ తగ్గుముఖం పడుతోంది. మహమ్మారి బారినపడి సోమవారం 31 మంది మృతి చెందినట్లు ప్రకటించాయి ఆ దేశ ఆరోగ్య వర్గాలు. మొత్తం మృతుల సంఖ్య 2,943కు చేరినట్లు వెల్లడించాయి. తాజా మరణాలన్నీ వైరస్​ తీవ్రత అధికంగా ఉన్న హుబేలోనే నమోదయ్యాయి. కొత్తగా 125 మందికి వైరస్​ సోకినట్లు తెలిపారు అధికారులు. ఇందులో 114 మంది హుబేకు చెందిన వారే.

ఇదిలా ఉంటే ప్రపంచ వ్యాప్తంగా 89,527 మందికి వైరస్​ సోకినట్లు ప్రకటించింది ప్రపంచ ఆరోగ్య సంస్థ(డబ్ల్యూహెచ్​ఓ). మొత్తం 3,056 మంది మృత్యువాతపడినట్లు పేర్కొంది.

దక్షిణ కొరియాలో పెరుగుతున్న కేసులు

దక్షిణ కొరియాలో నూతనంగా 477 మందికి వైరస్​ సోకినట్లు అధికారులు తెలిపారు. దీంతో ఆ దేశంలో మొత్తం కేసుల సంఖ్య 5 వేల మందికి చేరింది. ఇప్పటివరకు 19 మంది ప్రాణాలు కోల్పోయారు. జపాన్​లో 980, ఇటలీలో 2,036, ఫ్రాన్స్​లో 191, ఇరాన్​లో 1500లకుపైగా కేసులు నమోదయ్యాయి. ఇక్కడ వరుసగా 12, 52, 66 మంది చొప్పున మరణించారు.

ఇదీ చూడండి:బ్రెజిల్​లో పడవ బోల్తా..18 మంది మృతి