జపాన్ విహార నౌకలోని మరో 13 మంది ప్రయాణికులకు కరోనా సోకినట్లు ఆ దేశ ఆరోగ్య మంత్రిత్వ శాఖ ప్రకటించింది. మొత్తం 52 మందికి వైద్య పరీక్షలు నిర్వహించగా 13 కొత్త కేసులు నమోదైనట్లు తెలిపింది. దీనితో నౌకలో కరోనా బాధితుల సంఖ్య 634కు చేరింది.
మొత్తం 8 మంది భారతీయులకు కరోనా..
వైరస్ భయంతో జపాన్ తీరంలో నిలిపి ఉంచిన డైమండ్ ప్రిన్సెస్ నౌకలో మరో భారతీయుడికి కొవిడ్-19 (కరోనా) వైరస్ సోకినట్లు భారత రాయబార కార్యాలయం తెలిపింది. నౌకలో వైరస్ సోకిన భారతీయుల సంఖ్య ఎనిమిదికి చేరినట్లు అధికారులు స్పష్టం చేశారు. వీరికి ప్రత్యేక వార్డులో చికిత్స అందిస్తున్నట్లు వెల్లడించారు. నౌకలో పరిస్థితులపై జపాన్ అధికారులతో ఎప్పటికప్పుడు సంప్రదింపులు జరుపుతున్నట్లు పేర్కొన్నారు.
క్రూయిజ్ షిప్లో 634కు చేరిన కేసులు 500 మందికి విముక్తి...
జపాన్ అధికారులు నౌకలోని ప్రయాణికులందరికి వైద్య పరీక్షలు నిర్వహిస్తున్నారు. వైరస్ నెగటివ్ వచ్చిన 500 మందిని వారి నివాసాలకు పంపించే ఏర్పాట్లు చేస్తున్నారు అధికారులు.
3711 మంది...
మొత్తం 3,711 మందితో కూడిన డైమండ్ ప్రిన్సెస్ నౌక ఈ నెల మొదట్లో జపాన్ తీరంలోకి ప్రవేశించింది. హంకాంగ్లో దిగిన ఓ ప్రయాణికుడికి వైరస్ లక్షణాలు కనిపించడం వల్ల నౌకను యోకొహోమా తీరంలోనే నిలిపివేశారు. అప్పటి నుంచి నౌకను నిర్బంధంలోనే ఉంచారు. ఇందులో 138 మంది(ఆరుగురు ప్రయాణికులు, 132 మంది సిబ్బంది) భారతీయులు ఉన్నారు.
దక్షిణ కొరియాలో ఓ వ్యక్తి మృతి..
చైనాలోనే కాకుండా ప్రపంచ వ్యాప్తంగా పలు దేశాల్లోనూ కరోనా వల్ల ప్రాణాలు కోల్పోతున్నారు. తాజాగా దక్షిణ కొరియాలో ఓ వ్యక్తి మరణించినట్లు ఆ దేశ అధికారులు ప్రకటించారు. మరో 22 మందికి వైరస్ సోకినట్లు వెల్లడించారు. ఈ నేపథ్యంలో అత్యవసర పరిస్థితుల్లో తప్ప ప్రజలను బయటకు రావద్దని సూచించింది అక్కడి అధికార యంత్రాంగం.
ఇరాన్లో కరోనా ధాటికి ఇద్దరు మరణించిన తర్వాత... కొత్తగా మరో 3 కేసులు నమోదయ్యాయని ప్రకటించారు అధికారులు.
చైనాలో 2,118 మంది మృతి..
చైనాలో కరోనా వైరస్ కొత్త కేసులు బుధవారం భారీగా తగ్గాయి. కొన్ని రోజులతో పోల్చితే అతి తక్కువగా 394 మాత్రమే నూతన కేసులు నమోదైనట్లు చైనా జాతీయ ఆరోగ్య కమిషన్‌ వెల్లడించింది. ఇప్పటివరకు వైరస్ సోకిన వారి సంఖ్య 74,756కు చేరగా.. తాజాగా 114మంది మృతితో మరణాల సంఖ్య 2,118కి పెరిగింది.
