ఉగ్రవాదులకు వరంలా మారిన కరోనా!

కరోనా వైరస్ ప్రపంచ దేశాలకు శాపంలా మారితే, పాకిస్థాన్​లోని ఉగ్రవాదులకు మాత్రం వరంలా మారింది. జైళ్లలో ఖైదీలకు కరోనా సోకుతుందని.. లష్కరే తోయిబా అధినేత హఫీజ్​ సయీద్​ సహా అనేక మంది ఉగ్రవాదులను ఇళ్లకు పంపింది ఇమ్రాన్ ఖాన్​ ప్రభుత్వం.

పాకిస్థాన్​లోని ఉగ్రవాదులకు కరోనా సాకుతో స్వేచ్ఛను ప్రసాదించింది అక్కడి ప్రభుత్వం. జైళ్లలో ఖైదీలకు కరోనా సోకుతుందని కారణం చూపుతూ అనేక మంది ముష్కరులను ఇళ్లకు పంపించివేసింది. వీరిలో ప్రమాదకర లష్కరే తోయిబా ఉగ్రసంస్థ అధినేత హఫీజ్ సయీద్​ కూడా ఉన్నాడు. లాహోర్​ జైలులోని 50 మంది ఖైదీలకు కరోనా సోకినట్లు గత నెలలో తెలిపారు పాక్​లోని పంజాబ్​ రాష్ట్ర ముఖ్యమంత్రి.

పాక్​ను బ్లాక్​లిస్ట్​ నుంచి నుంచి తొలగించాలంటే ఉగ్రకార్యకలాపాలను పూర్తిగా నిషేధించాలని ఫైనాన్షియల్ యాక్షన్​ టాస్క్​ ఫోర్స్​(ఎఫ్​ఏటీఎఫ్​) తేల్చి చెప్పిన నేపథ్యంలో గత కొన్ని నెలల్లో ఇనేక మంది ఉగ్రవాదులను అరెస్టు చేసింది ఇమ్రాన్​ ఖాన్​ ప్రభుత్వం. ప్రపంచ దేశాలన్ని ఇప్పుడు కరోనా మహమ్మారిపై పోరు చేస్తుంటే ఇదే అదనుగా పాక్ ప్రభుత్వం ఉగ్రవాదులకు విముక్తి కల్పించింది. ఇప్పుడు వారంతా యథేచ్ఛగా తమ కార్యకలాపాలను తిరిగి కొనసాగిస్తున్నారు.

పాక్​ను బ్లాక్​లిస్ట్​ నుంచి తొలగించాలా? వద్దా? అనే విషయంపై వచ్చే నెలలో సమీక్ష నిర్వహించనుంది ఎఫ్​ఏటీఎఫ్​. ఈ నేపథ్యంలోనే ఉగ్రవాద కార్యకలపాలకు పాల్పడుతున్న 1000మందిని పాక్ ప్రభుత్వం అధికారిక జాబితా నుంచి కావాలనే తొలగించినట్లు న్యూయార్క్​కు చెందిన డబ్ల్యూజేఎస్​ సంస్థ తెలిపింది.

కశ్మీర్​లోకి చొరబాట్లు...

ప్రపంచం దృష్టి కరోనా మీద ఉంటే పాక్​ మాత్రం కశ్మీర్​లోకి ఉగ్రవాదులను ఉసిగొల్పే పనిలో నిమగ్నమైంది. ఆ దేశంలో కరోనా ఉద్ధృతి ఉన్నా ఏ మాత్రం లెక్క చేయకుండా కశ్మీర్ సరిహద్దులో వరుస కవ్వింపు చర్యలకు పాల్పడుతోంది. కాల్పుల విరమణ ఒప్పందాన్ని పదే పదే ఉల్లంఘిస్తోంది. మోర్టార్ షెల్స్​తో సరిహద్దు గ్రామాలే లక్ష్యంగా దాడులకు తెగబడుతోంది. జవాన్లు, సాధారణ పౌరుల ప్రాణాలను బలిగొంటోంది. కరోనా రోగులను కశ్మీర్​లోకి పంపి వైరస్​ వ్యాప్తిని పెంచాలనీ.. పాక్​ దురాలోచన చేస్తున్నట్లు అధికారులు తెలిపారు.