కరోనా మహమ్మారి తగ్గుముఖం పడుతున్న నేపథ్యంలో దేశంలోని పలు వినోద కేంద్రాలను తిరిగి ప్రారంభిస్తోంది చైనా. అందులో భాగంగా షాంఘైలోని ప్రముఖ డిస్నీల్యాండ్ థీమ్ పార్క్ను సోమవారం తిరిగి ప్రారంభించింది. వైరస్ వ్యాప్తిని కట్టడి చేసేందుకు పలు ఆంక్షలతో సందర్శకులకు అనుమతించింది.
చైనాలో వినోదాల విందు- డిస్నీల్యాండ్ రీఓపెన్ కొవిడ్-19 వ్యాప్తి తర్వాత జనవరి చివరి వారంలో డిస్నీ రిసార్ట్ను తాత్కాలికంగా మూసివేశారు. ప్రస్తుతం కేసులు తగ్గుతున్నందున.. టికెట్ అమ్మకాలను 30 శాతానికి పరిమితం చేసి ప్రారంభించారు.
పెరుగుతున్న కొత్త కేసులు
చైనాలో ఆదివారం ఒక్కరోజే 17 కొత్త కేసులు నమోదైనట్లు చైనా జాతీయ ఆరోగ్య కమిషన్ ప్రకటించింది. వైరస్కు కేంద్ర బిందువైన వుహాన్ నగరంలో 5, జిలిన్ రాష్ట్రంలో 3, లియోనింగ్ రాష్ట్రంలో ఒకటి, హీలోంగ్జియాంగ్ రాష్ట్రంలో ఒక కేసు నమోదయ్యాయని తెలిపింది. మొత్తం కేసుల్లో 12 లక్షణాలు కనబడనివే ఉన్నాయని.. ఇలాంటి కేసులు మొత్తం 780కి చేరినట్లు వెల్లడించింది.
ఆత్మ సంతృప్తి వద్దు..
కొవిడ్-19 మహమ్మారిని పూర్తి స్థాయిలో కట్టడి చేయటంలో సఫలమైనట్లు సంకేతాలిస్తూ.. కొద్ది రోజుల క్రితం వైరస్ సోకే ప్రమాద స్థాయిలను కనిష్ఠానికి తగ్గించింది చైనా. ప్రభుత్వ మార్గదర్శకాలతో.. వ్యాపారాలు, పరిశ్రమలు ఉత్పత్తి మొదలుపెట్టాయి. కరోనాను కట్టడి చేయగలిగామనే ఆత్మసంతృప్తి చెందకుండా.. నిరంతరం అప్రమత్తంగా ఉండాలని సూచించింది జిన్పింగ్ ప్రభుత్వం.
చైనాలో మొత్తం కేసుల సంఖ్య 82, 918కి చేరింది. 4,633 మంది ప్రాణాలు కోల్పోయారు. ఇంకా 141 మంది ఆస్పత్రుల్లో చికిత్స పొందుతున్నారు.
