అక్టోబర్​ 1న భారీ కవాతుకు చైనా సర్వసన్నద్ధం

తమ జాతీయ దినోత్సవాన్ని పురస్కరించుకొని.. అక్టోబర్​ 1న చైనా భారీ కవాతు నిర్వహించనుంది. అందులో భాగంగా శనివారం పెద్ద ఎత్తున రిహార్సల్స్​ చేసింది చైనా సైన్యం. క్షిపణులు, యుద్ధట్యాంకుల్ని ప్రదర్శించి.. తమ సైనిక శక్తిని ప్రపంచానికి చాటింది డ్రాగన్​ దేశం.

70వ జాతీయ దినోత్సవం జరుపుకునేందుకు చైనా భారీగా ముస్తోబవుతోంది. తమ స్వాతంత్య్ర దినోత్సవాన.. భారీ పరేడ్​ నిర్వహించనుంది చైనా సైన్యం. అక్టోబర్​ 1న జరిగే ఈ కార్యక్రమంలో భాగంగా క్షిపణులు, యుద్ధ ట్యాంకులతోశనివారం పెద్ద ఎత్తున రిహార్సల్స్​ నిర్వహించింది. చిన్న, పెద్ద క్షిపణుల్ని మోసుకొస్తున్న భారీ ట్రక్కులు, యుద్ధట్యాంకులతో చారిత్రక చాంగ్​'ఆన్ ప్రాంతం దద్దరిల్లింది.

రిహార్సల్స్​లో వీటితో పాటు అణ్వాయుధాలు, అధునాతన సాంకేతిక పరికరాలు ప్రదర్శిస్తున్నట్లు అధికారులు వెల్లడించారు. చైనా ఆర్మీ, నేవీ, వైమానిక దళం, వ్యూహాత్మక సహాయక దళాలు తమ ఆయుధాల ప్రదర్శన చేస్తున్నట్లు తెలిపారు. 2017తో పోలిస్తే ఈ ఏడాది పరేడ్​ను చాలా గొప్పగా నిర్వహించనున్నట్లు వివరించారు.

సుమారు 2 మిలియన్ల సైన్యంతో ప్రపంచంలోనే అతి పెద్ద బలగం కలిగిన దేశంగా పేరు పొందిన చైనా.. తిరుగులేని శక్తిగా అవతరించాలని భావిస్తోంది. కవాతుతో తమ సైనిక బలాన్ని ప్రపంచానికి.. ముఖ్యంగా అమెరికాకు ప్రదర్శించేందుకు సిద్ధమైంది.

ఇదీ చూడండి:'లైట్​ షో': డ్రోన్లతో ప్రదర్శన.. వీక్షకులకు కనువిందు