ప్రపంచ వ్యాప్తంగా దాదాపు 179 దేశాల్లో కరోనా వ్యాక్సిన్ ఇప్పటికే అందుబాటులోకి వచ్చింది. ఇదే సమయంలో చైనా టీకాలు పంపిణీ చేస్తోన్న పలు దేశాల్లో కరోనా మహమ్మారి మరోసారి విజృంభిస్తోంది. దీంతో చైనా వ్యాక్సిన్‌ల సమర్థతపై ఆయా దేశాలు అనుమానాలు వ్యక్తం చేస్తున్నాయి. ఈ నేపథ్యంలో చైనా సినోఫార్మ్‌ అభివృద్ధి చేసిన వ్యాక్సిన్ ఎక్కువ వయసున్న (50ఏళ్ల వయసుపైబడిన) వారికి కరోనా నుంచి రక్షణ కల్పించడంలో తక్కువ సామర్థ్యం కలిగి ఉన్నట్లు హంగేరీలో జరిపిన అధ్యయనంలో తేలింది. దీంతో చైనా టీకాల పనితీరు మరోసారి చర్చనీయాంశమయ్యింది.
తక్కువ యాంటీబాడీలు..
కరోనా వైరస్‌ను ఎదుర్కొనే వ్యాక్సిన్‌లను చైనా ఇప్పటివరకు మూడింటిని అభివృద్ధి చేసింది. ఇందులో సినోఫార్మ్‌ రూపొందించిన టీకా పనితీరును విశ్లేషించేందుకు హంగేరీలో ఓ అధ్యయనం చేపట్టారు. దాదాపు 450మందిలో అధ్యయనం జరపగా.. వీరిలో 50ఏళ్ల వయసు కంటే తక్కువగా ఉన్న వారిలోనే 90శాతం యాంటీబాడీలు ఉన్నట్లు గుర్తించారు. కానీ, వయసు పెరిగే కొద్దీ (టీకా తీసుకున్న పెద్దవారిలో) యాంటీబాడీల స్థాయిలు తక్కువగా ఉన్నట్లు కనుగొన్నారు. ముఖ్యంగా 60ఏళ్ల వయసున్న 25శాతం మందిలో యాంటీబాటీల ప్రతిస్పందనలు లేకపోగా.. 80ఏళ్లకు పైబడిన 50శాతం మందిలో వ్యాక్సిన్ రక్షణ కల్పించడం లేదనే అంచనాకు వచ్చారు. దీనివల్ల ఈ వ్యాక్సిన్ తీసుకున్న ఎక్కువ మంది వృద్ధులు కరోనా వైరస్‌ బారినపడే అవకాశముందని నిపుణులు హెచ్చరిస్తున్నారు.