కరోనా పుట్టుకకు కేంద్ర బిందుమైన చైనాలో వైరస్ కేసులు పూర్తిగా తగ్గుముఖం పట్టినట్లు కనిపిస్తోంది. ఇప్పటికే అక్కడ రోజువారీ కరోనా కేసుల సంఖ్య గణనీయంగా తగ్గగా.. శుక్రవారం కేవలం ఒకే ఒక్క పాజిటివ్ కేసు నిర్ధరణ అయినట్లు ఆ దేశ జాతీయ ఆరోగ్య కమిషన్(ఎన్హెచ్సీ) ప్రకటించింది. అది కూడా విదేశాల నుంచి వచ్చిన వ్యక్తిలోనే గుర్తించినట్లు పేర్కొంది. కొవిడ్-19తో కొత్తగా ఎవరూ మరణించలేదని స్పష్టం చేసింది.
చైనాలో ఇప్పటివరకు మొత్తం 82,875 మందికి వైరస్ సోకింది. 4,633 మంది ప్రాణాలు కోల్పోయారు. 77,685 మంది మహమ్మారి బారి నుంచి పూర్తిగా కోలుకున్నారు. ఆ దేశంలో ప్రస్తుతం 557 యాక్టివ్ కేసులు మాత్రమే ఉన్నాయి.
చైనాలో గతకొద్ది రోజులుగా స్థానిక కేసులేమీ నమోదుకావట్లేదు. అయితే ఇప్పటివరకు విదేశాల నుంచి వచ్చిన 1,671 మందికి వైరస్ సోకినట్లు నిర్ధరణ అయింది.
28 రోజులుగా సున్నా కేసులు
కరోనా పుట్టినిల్లు అయిన వుహాన్లో గత 28 రోజులుగా ఒక్క కొత్త కేసు కూడా నమోదు కాకపోవడం గమనార్హం. అయితే వ్యాధి లక్షణాలు లేని 20 కొత్త కేసులను గుర్తించారు అధికారులు. వీటితో కలిపి ఇలా వైరస్ లక్షణాలు బయటపడకుండా పాజిటివ్గా తేలిన వారి సంఖ్య హుబే రాష్ట్రంలో 989కి చేరింది.
దక్షిణ కొరియాలోనూ తగ్గుముఖం
ఇప్పటికే 10,780 కరోనా పాజిటివ్ కేసులు నమోదైన దక్షిణ కొరియాలోనూ కొత్తగా వైరస్ బారినపడుతున్న వారి సంఖ్య క్రమంగా తగ్గుతోంది. తాజాగా కేవలం 6 కొవిడ్-19 పాజిటివ్ కేసులను గుర్తించినట్లు అధికారులు వెల్లడించారు. గత నెల రోజులుగా నమోదైన రోజువారీ కేసుల్లో ఇదే అత్యల్పం. వైరస్తో తీవ్ర ప్రభావానికి గురైన డేగు నగరంలో ఒక్క కొత్త కేసూ నమోదు కాలేదు.
దక్షిణ కొరియాలో ఇప్పటివరకు మొత్తం 10,780 మందికి వైరస్ సోకగా.. 250 మంది ప్రాణాలు కోల్పోయారు. 9,123 మంది పూర్తిగా కోలుకోగా.. ప్రస్తుతం 1407 యాక్టివ్ కేసులున్నాయి.
