కరోనా కల్లోలం: చైనాలో 490కి చేరిన మృతుల సంఖ్య

కరోనా వైరస్​ ధాటికి చైనాలో మృతుల సంఖ్య నానాటికీ పెరుగుతూనే ఉంది. తాజాగా ఈ సంఖ్య 490కి చేరినట్లు ఆ దేశ ప్రభుత్వం ప్రకటించింది. మరో 3,156 మందికి ఈ వైరస్​ సోకినట్లు వెల్లడించింది.

కరోనా విజృంభణ కొనసాగుతోంది. మృత్యుఒడిని చేరుకుంటున్నవారి సంఖ్య పెరిగిపోతోంది. వ్యాధికి ప్రధాన కేంద్రంగా నిలిచిన చైనాలో వైరస్​ సోకి మృతి చెందిన వారి సంఖ్య 490కి చేరింది.

హుబె ప్రావిన్స్​లోనే 24 గంటల వ్యవధిలో 65 మంది ప్రాణాలు కోల్పోవటం తీవ్రతకు అద్దం పడుతోంది. ఇప్పటి వరకు 20 వేల మందికిపైగా ఈ వైరస్​ బారిన పడగా.. తాజాగా మరో 3,156 మందికి వైరస్​ సోకిట్లు అధికారిక ప్రకటన చేసింది డ్రాగన్​ ప్రభుత్వం.

ప్రపంచ వ్యాప్తంగా మరో 26 దేశాల్లో ఈ వైరస్​ విస్తరించి ఆందోళన కలిగిస్తోంది. తాజాగా బెల్జియంలో తొలికేసు నమోదైనట్లు అక్కడి ప్రభుత్వం ప్రకటించింది. ఈ నేపథ్యంలో చైనాలోని తమ పౌరులు వెంటనే స్వదేశానికి తిరిగిరావాలని కోరింది బ్రిటన్​.

ఇదీ చూడండి: 10 రోజుల్లో 1000 పడకల ఆసుపత్రి.. ఎలా?