డబ్ల్యూహెచ్​ఓ వ్యాఖ్యలపై స్పందించిన చైనా

ప్రపంచ ఆరోగ్య సంస్థ (డబ్ల్యూహెచ్​ఓ)కు తమకు మధ్య ఎక్కడో అపార్ధం జరిగిందని చైనా తెలిపింది. డబ్ల్యూహెచ్​ఓ చీఫ్ టెడ్రోస్ చేసిన వ్యాఖ్యలపై ఈ విధంగా స్పందించింది. పర్యటన తేదీ ఖరారుపై త్వరలోనే స్పష్టత వస్తుందని ఆశిస్తున్నామంది.

చైనా వైఖరిని విమర్శిస్తూ ప్రపంచ ఆరోగ్య సంస్థ (డబ్ల్యూహెచ్​ఓ) అధ్యక్షుడు టెడ్రోస్​ అథనోమ్​ చేసిన వ్యాఖ్యలపై డ్రాగన్ స్పందించింది. ఎక్కడో అపార్థం జరిగి ఉండొచ్చని భావిస్తున్నామని తెలిపింది. ఈ మేరకు చైనా విదేశాంగ ప్రతినిధి హువా చున్​యింగ్ బుధవారం స్పష్టం చేశారు. డబ్ల్యూహెచ్​ఓ ప్రతినిధుల పర్యటనకు అనుమతించడంపై ఇప్పటివరకు ఎలాంటి స్పష్టత ఇవ్వని చైనా, ఈ వ్యాఖ్యలు చేయడం గమనార్హం.

"డబ్ల్యూహెచ్​ఓ బృందం పర్యటన తేదీల ఖరారుపై ఇరు పక్షాల మధ్య చర్చలు కొనసాగుతున్నాయి. త్వరలోనే ఈ విషయంపైన స్పష్టత వస్తుందని ఆశిస్తున్నాను. ప్రపంచ ఆరోగ్య సంస్థ దీనిని అర్ధం చేసుకుంటుందని భావిస్తున్నాము.

టెడ్రోస్ వ్యాఖ్యలను అర్ధం చేసుకోగలం, కానీ ఎప్పుడైనా ఇతర ప్రాంతాల్లో పర్యటించాలని అనుకున్నప్పుడు ముందుగా ఆ విషయంపై అవతలి వారితో చర్చించాలి."

-హువా చున్​యింగ్, చైనా విదేశాంగ ప్రతినిధి

వారికే ప్రాధాన్యం..

కరోనా మళ్లీ విజృంభించడంపై స్పందిస్తూ ప్రపంచవ్యాప్తంగా పలు ప్రాంతాల్లో స్వల్పంగా వ్యాప్తిచెందుతోందని అన్నారు. దేశంలో మహమ్మారిని ఎదుర్కోవడంపైనే అధికారులు, నిపుణులు దృష్టి సారించారని చెప్పారు. అయినా కూడా డబ్ల్యూహెచ్​ఓ బృందం పర్యటనకు ప్రాధాన్యం ఇస్తున్నామన్నారు.

డబ్ల్యూహెచ్​ఓ బృందం పర్యటనకు చైనా జాప్యం చేయడంపై అనుమానాలు వ్యక్తం అవుతున్నాయి.

ఇదీ చదవండి :కరోనాపై నిపుణుల బృందానికి చైనా అనుమతి నిరాకరణ