ప్రపంచదేశాలపై సైన్యం దండయాత్రకు చైనా సై!

విదేశాల్లో సైనిక చర్యలు చేపట్టేందుకు సులభంగా పీఎల్​ఏకు అధికారమిచ్చేందుకు చైనా కొత్త చట్టాన్ని రూపొందిస్తోంది. ఇటీవలే ఇందుకు సంబంధించిన ముసాయిదాను ప్రజాభిప్రాయ సేకరణకు పంపించింది. తమ ప్రయోజనాలను రక్షించుకునేందుకు ఈ చర్యలు చేపడుతున్నట్టు చైనా చెబుతోంది. కానీ ఇది భారత్​ వంటి దేశాలకు చేటు చేస్తుందని అంటున్నారు నిపుణులు.

దుందుడుకు వైఖరితో నిత్యం వార్తలో నిలిచే ఉంటుంది పీపుల్స్​ లిబరేషన్​ ఆర్మీ(పీఎల్ఏ​). చైనా సైన్యం ఆగడాలపై ప్రపంచ దేశాలు ఎప్పటికప్పుడు ఆందోళన వ్యక్తం చేస్తూనే ఉంటాయి. అయినప్పటికీ బీజింగ్ తన ప్రవర్తనను మార్చుకోవడం లేదు. సైన్యాన్ని కట్టడి చేయాల్సింది పోయి.. ప్రపంచ దేశాలపై దండయాత్రకు పంపించేందుకు చట్టపరంగా ఎలాంటి సమస్యలు తలెత్తకుండా జాగ్రత్తపడుతోంది. ఈ క్రమంలోనే 'నేషనల్​ డిఫెన్స్​' చట్టాన్ని తీసుకొస్తోంది.

ప్రజాభిప్రాయ సేకరణ

పీఎల్​ఏను దండయాత్రలకు అనుగుణంగా తీర్చిదిద్దే విషయంపై ప్రజల అభిప్రాయాలను సేకరిస్తోంది చైనా అత్యున్నత నిర్ణాయక కమిటీ ఎన్​పీసీ( నేషనల్​ పీపుల్స్​ కాంగ్రెస్​). కమ్యూనిస్ట్​ చైనాలో ఇలా ప్రజాభిప్రాయ సేకరణ చేయడం చాలా అరుదు.

భారత్​ కోణంలో నుంచి చూస్తే ఇది ప్రమాదకరమైన విషయమే. ఇలాంటి చట్టాన్ని తీసుకొస్తే... పాక్​ ఆక్రమిత కశ్మీర్​, శ్రీలంక, మయన్మార్​, మాల్దీవులు, హిందూ మహా సముద్రంలోని ఎక్కడైనా చైనా సైనిక చర్యలు చేపట్టవచ్చు. ఆయా దేశాల అనుమతులు కూడా తీసుకోకుండా ఈ చర్యలు చేపట్టే అవకాశముంది.

ఇదీ చూడండి:-నేపాల్​నూ వదలని చైనా- సరిహద్దులో దురాక్రమణలు

ప్రపంచశక్తిగా ఎదిగేందుకు చైనా చేపడుతున్న దుశ్చర్యల్లో ఈ ప్రతిపాదిత 'నేషనల్​ డిఫెన్స్​' చట్టం ఒకటి. దీనితో తన ఆర్థిక, సైనిక శక్తిని ప్రదర్శించుకోవాలని చైనా చూస్తోంది. ఈ చట్టంతో ప్రపంచంలో ఎక్కడైనా, ఏ పరిస్థితుల్లోనైనా జోక్యం చేసుకునేందుకు చైనా సైన్యానికి న్యాయపరంగా ఎలాంటి అడ్డంకులు ఉండవు.

తమ ప్రయోజనాలను రక్షించుకునేందుకు ఇవి అవసరమని చైనా వాదించినా.. చివరకు ఈ పరిణామాలు ప్రాంతీయంగా అనిశ్చితులకు దారి తీస్తాయి.

ఇదీ చూడండి:-భారత్‌ను కట్టడి చేసేందుకు చైనా ఎత్తుగడ!

వచ్చే నెల 19వరకు...

గత బుధవారం జరిగిన 13వ ఎన్​పీసీ స్టాండింగ్​ కమిటీ సమావేశం అనంతరం ప్రజాభిప్రాయ సేకరణను మొదలుపెట్టారు. దీనిపై స్పందించేందుకు వచ్చే నెల 19వరకు గడువు ఇచ్చారు.

1997లో 'లా ఆన్​ నేషనల్​ డిఫెన్స్​'ను అమలు చేసింది చైనా. అయితే ఇది పాతబడిపోయిందని.. కొత్త ఆపరేషన్లు, చైనా మిలిటరీ అవసరాలకు అనుగుణంగా చట్టాన్ని సంస్కరించాల్సిన సమయం వచ్చిందని ఆ దేశ రక్షణమంత్రి వీ ఫెంగ్​ పేర్కొన్నారు. ప్రజలకు ఆమోదయోగ్యం తీర్చిదిద్దేందుకు ప్రభుత్వం ఈ సంస్కరణలు చేపడుతోందని చైనా మీడియా కథనం ప్రచురించింది.

అయితే శనివారం ఈ ముసాయిదాను ఎన్​పీసీ తన వెబ్​సైట్​ నుంచి తొలగించింది.

(సంజీవ్ బారువా- సీనియర్ పాత్రికేయులు)

ఇదీ చూడండి:-ఓవైపు శాంతిమంత్రం - మరోవైపు సమర తంత్రం