భారత్- చైనా సరిహద్దులో ఉద్రిక్త పరిస్థితులను తగ్గించేందుకు రెండు దేశాలు చర్యలు తీసుకుంటున్నాయని చైనా విదేశాంగ శాఖ అధికార ప్రతినిధి హువా చున్యింగ్ తెలిపారు. సమస్యను సామరస్యంగా పరిష్కరించుకుంటున్నామన్నారు. రెండు దేశాల మధ్య దౌత్య, సైనిక స్థాయి చర్చల అనంతరం ఏకాభిప్రాయం కుదిరిందన్నారు. ఆ ప్రకారమే ముందుకు సాగుతున్నట్లు వివరించారు.
ఉద్రిక్తతలు తగ్గించేందుకు క్షేత్రస్థాయిలో ఎలాంటి చర్యలు తీసుకుంటున్నారనే విషయంపై మాత్రం స్పష్టత ఇవ్వలేదు చున్యింగ్. ఇందుకు సంబంధించి పూర్తి వివరాలు ఇంకా తెలియాల్సి ఉందన్నారు. తూర్పు లద్దాఖ్లో సరిహద్దు సమస్యపై భారత్- చైనా సైనికాధికారులు జరిపిన చర్చలు సత్ఫలితాలిచ్చాయని తెలిసిన మరునాడే ఈ విషయంపై స్పందించారు చున్యింగ్. వాస్తవాధీన రేఖ వెంబడి ఉన్న బలగాలను పరిమిత సంఖ్యలో ఉపసంహరించుకునేందుకు రెండు దేశాల మధ్య ఏకాభిప్రాయం కుదిరినట్లు సమాచారం.