కరోనా మహమ్మారి విజృంభిస్తున్న వేళ వ్యాక్సిన్ కోసం యావత్ ప్రపంచం ఎదురుచూస్తోంది. ఇప్పటికే తొలి వ్యాక్సిన్ను రష్యా విడుదల చేయగా.. తాజాగా చైనా తమ దేశ వ్యాక్సిన్కు తొలి ఆవిష్కరణ పేటెంట్ను మంజూరు చేసింది. ఈ వ్యాక్సిన్ను బయోఫార్మాస్యూటికల్ సంస్థ కాన్సినో బయోలాజిక్స్ తయారు చేస్తోంది.
గ్లోబల్ టైమ్స్ నివేదిక ప్రకారం.. ఈ టీకా 'ఏడీ5-ఎన్కోవ్' అనే పునసంయోగ ఎడినోవైరస్ వెక్టార్. ఇది చైనా సైనిక విభాగంలోని అంటువ్యాధుల నిపుణుడు చెన్ వీ నేతృత్వంలోని బృందంతో కాన్సినో అభివృద్ధి చేసింది.
" పేటెంట్ మంజూరుతో టీకా సమర్థత, భద్రతను మరింత ధ్రువీకరించినట్లయింది. అధికారికంగా పేటెంట్ మంజూరుతో చైనా అభివృద్ధి చేసిన కొవిడ్-19 వ్యాక్సిన్పై మార్కెట్ విశ్వాసం పెరుగుతుంది. ముఖ్యంగా విదేశీ మార్కెట్లో విశ్వాసం పెరుగుతుంది."
- కాన్సినో
తొలి దశ క్లినికల్ ట్రయల్స్ ప్రారంభించిన మూడు రోజుల తర్వాత .. జాతీయ మేధో సంపత్తి పరిపాలన విభాగానికి పేటెంట్ కోసం మార్చి 18న దరఖాస్తు చేసుకున్నట్లు తెలిపింది కాన్సినో. ఆయితే.. ఆగస్టు 11న అనుమతులు వచ్చినట్లు వెల్లడించింది.
విదేశాల్లో మూడో దశ ట్రయల్స్..
విదేశాలలో నిర్వహించబోయే టీకా మూడోదశ ట్రయల్స్ సజావుగా సాగుతాయని కంపెనీ ప్రకటించింది. కాన్సినో పెద్దఎత్తున మూడోదశ క్లినికల్ ట్రయల్స్ చేసేందుకు మెక్సికోతో ఒప్పందం కుదుర్చుకుంది. ఈ వ్యాక్సిన్ మూడోదశ ట్రయల్స్కు తాము సహకరిస్తామని ఆగస్టు 9న ప్రకటించింది సౌదీ అరేబియా. అందుకోసం 5 వేల మంది వలంటీర్లను నియమించినట్లు తెలిపింది. అలాగే.. రష్యా, బ్రెజిల్, చిలీతో చర్చలు జరుపుతోంది.
మరోవైపు.. రష్యా తొలి బ్యాచ్ వ్యాక్సిన్ ఉత్పత్తిని ప్రారంభించింది. ప్రపంచ తొలి వ్యాక్సిన్ను విడుదల చేస్తున్నట్లు ఇటీవలే రష్యా అధ్యక్షుడు వ్లాదిమర్ పుతిన్ ప్రకటించారు. వచ్చే వారం రోజుల్లో ఈ వ్యాక్సిన్ మూడోదశ ట్రయల్స్ ప్రారంభం కానున్నాయి.
ఇదీ చూడండి: కరోనా వ్యాక్సిన్ రేసులో ఏ దేశం ఎక్కడ?
