'చైనా అంతరిక్ష కేంద్రం ప్రయోగం వాయిదా'

చైనా తన నూతన అంతరిక్ష కేంద్రం ద్వారా చేపట్టబోయే ప్రయోగాన్ని వాయిదా వేసింది. గురువారం తెల్లవారుజామున ఈ ప్రయోగం జరగాల్సి ఉండగా.. సాంకేతిక కారణాల వల్ల మిషన్​ పంపడం ఆలస్యమవుతుందని చైనా మ్యాన్​డ్​ స్పేస్​ ఓ ప్రకటనలో పేర్కొంది.

నూతన అంతరిక్ష కేంద్రం ద్వారా చైనా చేపట్టబోయే ప్రయోగాన్ని వాయిదా వేస్తున్నట్టు ఆ దేశం గురువారం తెలిపింది. తియాన్​ఝౌ-2 కార్గో అంతరిక్ష నౌకను గురువారం తెల్లవారుజామున ప్రయోగించాలని తొలుత భావించారు. కానీ, సాంకేతిక కారణాల వల్ల మిషన్​ను పంపించలేకపోతున్నామని స్పష్టం చేస్తూ.. చైనా మ్యాన్​డ్​ స్పేస్​ తన వెబ్​సైట్​లో రాసుకొచ్చింది. ఈ ప్రయోగాన్ని మళ్లీ ఎప్పుడు చేపడతారనే వివరాలు అందులో పేర్కొనలేదు.

చైనా అంతరిక్ష కేంద్రం నుంచి గత నెల 29న ప్రయోగించిన ప్రధాన తియాన్హె మాడ్యూల్​కు వెళ్లే మొదటి మిషన్ ఇది. మరో రెండు మాడ్యూల్స్​ ద్వారా.. మిషన్​కు సంబంధించిన వివిధ భాగాలు, సామగ్రితో సహా ముగ్గురు సిబ్బందిని పంపనున్నారు. ఇందుకోసం మొత్తం 10 ప్రయోగాల ప్రణాళికను సిద్ధం చేశారు శాస్త్రవేత్తలు.

ఆ దేశం చేపట్టిన తియాన్హే(హెవెన్లీ హార్మోనీ) ప్రయోగం విజయవంతమైందని భావించినప్పటికీ.. అది నీటి మీద కాకుండా నేలపై కూలుతుందనే విషయమై పెద్దఎత్తున విమర్శలు వెల్లువెత్తాయి. ఈ ప్రయోగంపై అమెరికా పరిశోధనా కేంద్రం(నాసా) తీవ్రస్థాయిలో మండిపడింది. అంతరిక్ష ప్రయోగాలలో బాధ్యతాయుతమైన ప్రమాణాలను పాటించడంలో చైనా విఫలమైందని నాసా అడ్మినిస్ట్రేటర్​ సెన్​.బిల్​ నెల్సన్​ అన్నారు.

2003లో తొలిసారిగా అంతరిక్షంలోకి వ్యోమగామిని పంపినప్పటి నుంచి చాలా తక్కువ సార్లు వైఫల్యాలను చవిచూసింది చైనా. మార్చ్​ 5బీ రాకెట్​ విఫలం కావడం వల్ల.. ఈ ప్రయోగాన్ని ఆలస్యం చేసింది.

ఇదీ చదవండి:అంగారక గ్రహంపై తొలిసారి చైనా అంతరిక్ష నౌక