'గల్వాన్ ఘటనపై దర్యాప్తు వేగవంతం చేయండి'

లద్దాఖ్​లో జరిగిన హింసాత్మక ఘటనపై దర్యాప్తు చేసి బాధ్యులను జవాబుదారీగా చేయాలని భారత్​ను చైనా కోరింది. సైన్యంలో క్రమ శిక్షణ తీసుకురావాలని చెప్పుకొచ్చింది. గల్వాన్ తరహా ఘటనలు జరగకుండా చూడాలని వ్యాఖ్యానించింది.

గల్వాన్ ఘటనపై దర్యాప్తు వేగవంతం చేయాలని చైనా.. భారత్​ను కోరింది. ఘటనకు కారకులైన వారిని జవాబుదారీని చేయాలని, సైన్యంలో క్రమశిక్షణ తీసుకురావాలని నీతి వాక్యాలు పలికింది. రెచ్చగొట్టే చర్యలను నియంత్రించి గల్వాన్ తరహా ఘటనలు జరగకుండా చూడాలని చెప్పుకొచ్చింది.

హింసాత్మక ఘటనకు తానే కారణమైనప్పటికీ... భారత్​పై పదేపదే ఆరోపణలు చేస్తోంది చైనా. అయితే చైనా వ్యాఖ్యలను భారత్ ఎప్పటికప్పుడు తిప్పికొడుతూనే ఉంది.

లద్దాఖ్ నుంచి సిక్కిం వరకు విస్తరించి ఉన్న వాస్తవాధీన రేఖ వెంబడి పలు ప్రాంతాల్లో చైనా- భారత్ మధ్య వివాదాలు తలెత్తుతున్నాయి. లద్దాఖ్​లోని పలు ప్రాంతాల్లో ఉద్రిక్తతలు ఇటీవల తీవ్ర స్థాయికి చేరాయి. భారత్​ భూభాగాల్లోకి చైనా సైన్యం చొచ్చుకొని వచ్చింది. అయితే భారత్​ ఒత్తిడితో చైనా తలొగ్గినప్పటికీ.. మరికొన్ని ప్రాంతాల్లో తన బలగాలను మోహరించే ఉంది.

జూన్ 15న జరిగిన ఘటనలో 20 మంది భారత జవాన్లు వీరమరణం పొందారు. ఈ ఘటనలో 35 మంది వరకు చైనా సైనికులు మరణించారని తెలుస్తుండగా.. ఈ విషయంపై డ్రాగన్ నోరు మెదపడం లేదు.

ఇదీ చదవండి-ఆ ప్రాంతాల నుంచి వెనక్కిమళ్లిన భారత్​-చైనా బలగాలు