భారత్తో సరిహద్దులో నెలకొన్న ఘర్షణలో చనిపోయిన సైనికుల సంఖ్యపై ఎట్టకేలకు వివరాలు వెల్లడించింది చైనా. పీపుల్స్ లిబరేషన్ ఆర్మీ(పీఎల్ఏ)కి 16 మంది సైనికుల మృతదేహాలను అప్పగించినట్లు భారత మీడియా నివేదించిన ఒక్క రోజు తర్వాత.. తొలిసారి ప్రాణాలు కోల్పోయిన సైనికుల సంఖ్యపై స్పష్టతనిచ్చింది. మృతిచెందిన వారి సంఖ్య 20 కన్నా తక్కువ ఉంటుందని, 70 మంది వరకు గాయపడ్డారని అంగీకరించింది.
ఈ మేరకు చైనా కమ్యూనిస్ట్ పార్టీ అధికారిక మీడియా గ్లోబల్ టైమ్స్.. గల్వాన్ లోయలో ఘర్షణ, మృతుల సంఖ్యపై బీజింగ్ విశ్లేషకుల అభిప్రాయాలను ప్రచురించింది.
" ఉద్రిక్తతలను తగ్గించేందుకే చైనా.. తమవైపు మృతుల సంఖ్యను వెల్లడించకపోవటానికి గల కారణమని విశ్లేషకులు వెల్లడించారు. చైనా 20 కంటే తక్కువ ఉన్న సంఖ్యను విడుదల చేస్తే.. భారత ప్రభుత్వం మళ్లీ ఒత్తిడికి లోనవుతుంది. సాయుధ దళాలకు పూర్తి స్వేచ్ఛను తమ ప్రభుత్వం ఇచ్చిందని భారత ప్రధాన మంత్రి నరేంద్ర మోదీ శుక్రవారం చెప్పారు. చైనా వైపు గల్వాన్ లోయలో ఘర్షణతో చెలరేగిన ఉద్రిక్తతను తగ్గించేలా వ్యాఖ్యానించారు. చైనా మృతుల సంఖ్య భారత్ కన్నా ఎక్కువగా ఉందని ఆ దేశ అధికారులు ఊహించటాన్ని చైనా విశ్లేషకులు, పరిశీలకులు తప్పుపట్టారు. స్వదేశంలో చైనా వ్యతిరేక భావనలను నియంత్రించకపోతే 1962 యుద్ధంలో కన్నా ఎక్కవగా అవమానపడాల్సి వస్తుందని హెచ్చరించారు. అతిపెద్ద మిత్ర దేశంతో కొత్త యుద్ధం చేయాల్సి వస్తుందని పేర్కొన్నారు."