'చైనీయులపై అమెరికా నిర్ణయం జాతి వివక్ష చర్య'

రాజకీయ ప్రయోజనాలు, జాతి వివక్షతోనే తమ విద్యార్థుల వీసాలను అమెరికా రద్దు చేసిందని చైనా ఆరోపించింది. ఈ నిర్ణయాన్ని తక్షణమే వెనక్కు తీసుకోవాలని కోరింది. హాంకాంగ్​ ప్రత్యేక హోదా రద్దుపై అమెరికా ప్రకటన మార్కెట్​ స్ఫూర్తికి విరుద్ధమని విమర్శించింది.

తమ విద్యార్థుల వీసాలను ఉపసంహరించుకుంటామని అమెరికా అధ్యక్షుడు డొనాల్డ్ ట్రంప్ ప్రకటించటంపై చైనా ఆక్షేపించింది. ఈ నిర్ణయం పూర్తిగా రాజకీయ ప్రయోజనాలు, జాతి వివక్ష చర్యేనని ఆరోపించింది.

ఈ నిర్ణయాన్ని అమెరికా వెనక్కు తీసుకోవాలని చైనా విదేశాంగ శాఖ అధికార ప్రతిని ఝావో లిజియాన్​ కోరారు. హాంకాంగ్​ ప్రత్యేక హోదా రద్దుకు సంబంధించి ట్రంప్​ ప్రకటనపైనా విమర్శలు చేశారు.

"అమెరికా తక్షణమే ఈ నిర్ణయాన్ని వెనక్కు తీసుకోవాలి. అమెరికాలో చదువుకుంటోన్న చైనా విద్యార్థుల హక్కులు, ప్రయోజనాలను రక్షించాలి. హాంకాంగ్​కు సంబంధించి అమెరికా ప్రకటన.. మార్కెట్​ పోటీతత్వ సూత్రాన్ని ఉల్లంఘిస్తోంది. అమెరికా- చైనా సామాజిక సంబంధాలకు భారీ నష్టం కలిగిస్తుంది."

- ఝావో లిజియాన్​, చైనా విదేశాంగ శాఖ

చైనా లక్ష్యంగా అమెరికా చర్యలు..

చైనాపై కొన్ని రోజులుగా తీవ్రస్థాయిలో మండిపడుతోన్న అమెరికా... ఇప్పుడు ఆంక్షల ఆయుధాన్ని ప్రయోగిస్తోంది. ఇందులో భాగంగానే చైనాకు చెందిన విద్యార్థులు, పరిశోధకులకు అమెరికాలో ప్రవేశాన్ని నిషేధించింది ట్రంప్ ప్రభుత్వం. అంతేకాకుండా చైనాకు వత్తాసు పలికిందని ఆరోపిస్తూ ప్రపంచ ఆరోగ్య సంస్థతో తెగదెంపులు చేసుకుంటున్నట్లు ప్రకటించారు ట్రంప్.

హాంకాంగ్‌ స్వేచ్ఛకు విఘాతం కలిగించేలా తీసుకొచ్చిన జాతీయ భద్రతా బిల్లును చైనా పార్లమెంటు ‘నేషనల్‌ పీపుల్స్‌ కాంగ్రెస్‌’ ఆమోదించడంపైనా ట్రంప్‌ ఆగ్రహం వ్యక్తం చేశారు. 1984లో బ్రిటన్‌తో కుదిరిన ఒప్పందానికి చైనా తూట్లు పొడుస్తోందని చెప్పారు.

ఇదీ చూడండి:అమెరికాకు చైనా విద్యార్థుల రాకపై నిషేధం