జావా సముద్రంలో ఇండోనేసియా విమాన శకలాలు గుర్తింపు

ఇండోనేసియాలో కనిపించకుండా పోయిన బోయింగ్​ 737-500 విమానం జావా సముద్రంలో కుప్పకూలినట్లు అధికారులు గుర్తించారు. 75 అడుగుల లోతులో విమాన శకలాలు ఉన్నట్లు తెలిపారు. ప్రయాణికుల్లో ఎవరూ ప్రాణాలతో బయటపడ్డట్టు సమాచారం లేదు.

ఇండోనేసియాలో అదృశ్యమైన బోయింగ్​ 737-500 విమానం జావా సముద్రంలో కుప్పకూలినట్లు అధికారులు ప్రకటించారు. 75 అడుగుల లోతులో విమాన శకలాలను గుర్తించామన్నారు. ఇదివరకే కొన్ని శకలాలు, వ్యర్థాలను వెలికి తీయగా.. అవి కూలి విమానానివేనని ధ్రువీకరించినట్టు స్పష్టం చేశారు.

"డైవర్​ టీం నుంచి సమాచారం అందింది. ప్రస్తుతం విమాన శకలాలు కనుగొనేందుకు వీలుగా సముద్ర వాతావరణం ఉంది. ఒకవేళ ఈ రోజు మధ్యాహ్నం వరకు వాతావరణం ఇలానే ఉంటే గాలింపు చర్యలను కొనసాగిస్తాం. విమానం కుప్పకూలిన స్థలం ఇదే అని కచ్చితంగా చెప్పగలం."

--హాది జాజంతొ, ఇండోనేసియా ఎయిర్ చీఫ్​ మార్షల్​

ఈ ఘటన పట్ల సంతాపం తెలిపారు ఇండోనేసియా అధ్యక్షుడు జోకో విడోడో. అయితే విమానం కుప్పకూలటానికి గల కారణాలు ఇంకా తెలియలేదన్నారు. ప్రయాణికుల్లో ఎవరూ ప్రాణాలతో బయటపడ్డట్లు సమాచారం లేదన్నారు. ఈ ఘటనపై దర్యాప్తునకు ఆదేశించినట్టు పేర్కొన్నారు.

టేకాఫ్​ అయిన కొద్దిసేపటికే..

మొత్తం 62మంది ప్రయాణికులతో బోయింగ్ 737 విమానం శనివారం మధ్యాహ్నం 1.56 నిమిషాలకు జకార్తా నుంచి బయలుదేరింది. 90 నిమిషాల్లో గమ్యస్థానానికి చేరుకోవాల్సి ఉండగా.. టేకాఫ్​ అయిన కొద్దిసేపటికే విమానంతో సంబంధాలు తెగిపోయాయి.