పెళ్లి వాహనంపై బాంబు దాడి- 15 మంది మృతి

అఫ్గానిస్థాన్​లో రెండు వేరు వేరు ప్రాంతాల్లో జరిగిన పేలుళ్లల్లో 16మంది ప్రాణాలు కోల్పోయారు. వీరిలో చాలా వరకు మహిళలు, యువతులే ఉన్నారు. పేలుళ్లకు తాలిబన్లే కారణమని ఆ దేశం ఆరోపిస్తోంది.

వరుస పేలుళ్లు అఫ్గానిస్థాన్​లో తీవ్ర విషాదం నింపాయి. ఈ విధ్వంస ఘటనల్లో ఇప్పటి వరకు 16మంది ప్రాణాలు కోల్పోయారు. వీరిలో చాలా మంది మహిళలు, యువతులు ఉన్నారు.

వివాహానికి వెళుతుండగా ఓ వాహనంపై బాంబు దాడి జరిగింది. ఈ ఘటనలో 15మంది మరణించారు. వీరిలో ఆరుగురు మహిళలు, ఆరుగురు యువతులు, ఇద్దరు శిశువులని అధికారులు తెలిపారు. మరో ఇద్దరు తీవ్రంగా గాయపడ్డారని చెప్పారు. ఉత్తర కుందుజ్​ రాష్ట్రంలో ఈ ఘటన చోటుచేసుకుంది.

కొద్ది గంటల వ్యవధిలోనే ఉత్తర సరి పుల్​ ప్రాంతంలోని ఓ చెక్​పోస్టుపై ఉగ్రవాదులు కాల్పులు జరిపారు. అనంతరం బాంబులతో దాడి చేశారు. ఈ ఘటనలో ఓ పోలీసు అధికారి ప్రాణాలు కోల్పోయారు.

ఈ పేలుళ్లకు తాలిబన్లే కారణమని అఫ్గానిస్థాన్​ అంతర్గత వ్యవహారాల శాఖ ఆరోపించింది.

ఇదీ చూడండి:-కండల వీరుడిగా 'ట్రంప్​'- కారణమేంటంటే!