మయన్మార్​ హింసపై జో బైడెన్ ఆందోళన​

మయన్మార్​లో ఆందోళన చేస్తున్న ప్రజలపై కాల్పులు జరపటాన్ని తప్పుపట్టారు అమెరికా అధ్యక్షుడు జో బైడెన్​. ఒక్కరోజే వంద మందికిపైగా ప్రాణాలు కోల్పోయిన ఘటన చాలా బాధాకరమని ఆందోళన వ్యక్తం చేశారు. అనవసరంగా ప్రజల ప్రాణాలు బలితీసుకున్నారని, అది చాలా దారుణమైన చర్యగా అభివర్ణించారు.

మయన్మార్​లో సైనిక హింసను తీవ్రంగా తప్పుపట్టారు అమెరికా అధ్యక్షుడు జో బైడెన్​. అమాయక ప్రజలపై అనవసరంగా కాల్పులకు పాల్పడటం సరికాదని సూచించారు. మయన్మార్​ సైన్యం అవలంబిస్తున్న తీరు క్రూరమైనదిగా పేర్కొన్నారు.

"ఇది చాలా క్రూరమైనది. పూర్తిగా దారుణం. ఎంతో మందిని అన్యాయంగా, అనవసరంగా బలిచేశారు. ఓకే రోజు వంద మందికిపైగా చనిపోయినట్లు తెలిసింది. అది చాలా దారుణమైన సంఘటన. "

- జో బైడెన్, అమెరికా అధ్యక్షుడు

76వ సైనిక దినోత్సవాన మయన్మార్​ భద్రతా బలగాలు శనివారం పేట్రేగిపోయాయి. సైనిక పాలనకు వ్యతిరేకంగా నిరసన తెలుపుతున్న ఆందోళనకారులను పిట్టలను కాల్చినట్లు కాల్చేశాయి. దీంతో దేశవ్యాప్తంగా 40 ప్రాంతాల్లో 114 మంది చనిపోయారు. ఫిబ్రవరి 1న ప్రజాస్వామ్య ప్రభుత్వాన్ని కూల్చివేసి, సైన్యం అధికారాన్ని హస్తగతం చేసుకున్న తర్వాత ఈ స్థాయిలో రక్తపాతం సంభవించడం ఇదే తొలిసారి.

ఇదీ చూడండి:మయన్మార్​ రక్తసిక్తం- ఒక్కరోజే 114 మంది మృతి