'భారతీయులారా.. నేపాల్ మీదగా ప్రయాణాలొద్దు'

మూడో దేశానికి వెళ్లాలనుకునే భారతీయులు నేపాల్​ మీదగా ప్రయాణించొద్దని ఆ దేశంలోని రాయబార కార్యాలయం సూచించింది. విదేశీ ప్రయాణికులపై నేపాల్ ఆంక్షలు విధించిన నేపథ్యంలో ఈ ప్రకటన చేసింది. గమ్యస్థానం నేపాల్ దేశమే అయిన ప్రయాణికులపై ఎలాంటి ఆంక్షలు లేవని తెలిపింది.

మూడో దేశానికి వెళ్లాలనుకునే భారతీయులు నేపాల్​ మీదగా ప్రయాణించడం మానుకోవాలని అక్కడి ఇండియన్ ఎంబసీ సూచించింది. కరోనా కట్టడి చర్యల్లో భాగంగా విదేశీయులు తమ దేశాన్ని రవాణా పాయింట్​గా వినియోగించుకోవడంపై నేపాల్ నిషేధం విధించింది. ఈ నేపథ్యంలో అక్కడి భారతీయ రాయబార కార్యాలయం తాజా ప్రకటన చేసింది.

ప్రత్యేకంగా నేపాల్​కు వెళ్లే ప్రయాణికులపై ఎలాంటి ఆంక్షలు ఉండవని నేపాల్​లోని భారతీయ ఎంబసీ తెలిపింది. ఇప్పటికే నేపాల్ చేరుకున్న భారతీయుల ప్రయాణాల కోసం నేపాల్ అధికారులతో సంప్రదింపులు జరుపుతున్నట్లు వెల్లడించింది.

కరోనా నియంత్రణ కోసం ఈ నిర్ణయం తీసుకుంది నేపాల్. త్రిభువన్ అంతర్జాతీయ విమానాశ్రయాన్ని మూడో దేశానికి వెళ్లేందుకు రవాణా పాయింట్​గా వినియోగించకుండా ఆంక్షలు విధించింది. ఏప్రిల్ 28 అర్ధరాత్రి నుంచి తదుపరి ప్రకటన చేసే వరకు ఇవి అమల్లో ఉంటాయని నేపాల్ హోంశాఖలోని ఇమ్మిగ్రేషన్ విభాగం వెల్లడించింది. నేపాల్​లో ఇప్పటివరకు మూడు లక్షల కరోనా కేసులు నమోదయ్యాయి. 3,176 మంది వైరస్​కు బలయ్యారు.

ఇదీ చదవండి-అమెరికా జనాభా 33.1 కోట్లు- నెమ్మదించిన వృద్ధి!