ఐదు రోజుల్లో 10వేల ఒంటెల్ని హతమార్చేందుకు ఆదేశం!

ఆస్ట్రేలియా ప్రభుత్వ నిర్ణయం మూగజీవాల పాలిట శాపంగా మారింది. ఇప్పటికే కార్చిచ్చులో వేల జంతువులు ప్రాణాలు కోల్పోగా.. తాజా నిర్ణయం మరికొన్ని వన్యప్రాణులను మృత్యువు ముంగిట నిలిపింది. కరువు ప్రాంతాల్లో నీటి ఎద్దడి సృష్టిస్తున్న ఒంటెలను హతమార్చాలని స్థానిక అధికారులకు ఆస్ట్రేలియా ప్రభుత్వం ఆదేశాలు జారీ చేసింది.

అడవుల్లో రగిలిన కార్చిచ్చు ఆస్ట్రేలియాను గడగడలాడిస్తోంది. లక్షాలది ఎకరాల అటవీ సంపదను పొట్టనబెట్టుకున్న దావానలం.. వేలాది మూగ జీవాలను మంటల్లో దగ్ధం చేసింది. వీటితో పాటు తీవ్ర ఆస్తి నష్టం కలిగించింది. పలు ప్రాంతాల్లో ప్రజలు నిరాశ్రయులయ్యారు. ఫలితంగా అనేక ప్రాంతాల్లో తీవ్ర కరువు పరిస్థితులు నెలకొన్నాయి. దావాగ్నిలో ఆవాసాలు కోల్పోయిన ఒంటెలు నీటి జాడ కోసం జనావాసాల వైపు మళ్లాయి. ఇళ్లల్లో ఉన్న నీటి వనరులపై దాడి చేసి దాహార్తిని తీర్చుకునే పనిలో పడ్డాయి.

ఐదు రోజుల్లో పూర్తికి ఆదేశాలు..

అసలే తీవ్ర కరువు ఎదుర్కొంటున్న అక్కడి ప్రజలకు ఒంటెల రాక ప్రతిబంధకంగా మారింది. ఉన్న కాస్త నీటిని ఒంటెలు తాగడం వారికి ఇబ్బందిగా మారింది. కరువు నెలకొన్న ప్రాంతాల్లో తీవ్ర నీటి ఎద్దడి ఏర్పడింది. వెంటనే ఈ విషయాన్ని ప్రభుత్వం దృష్టికి తీసుకెళ్లారు. ఈ పరిస్థితులను ఎదుర్కొనేందుకు అక్కడ నివసిస్తున్న10వేల ఒంటెలను చంపాలని ఆస్ట్రేలియా ప్రభుత్వం ఆదేశాలు జారీ చేసింది. ఈ పనిని ఐదు రోజుల్లో పూర్తి చేయాలని స్థానిక అధికారులకు గడువు విధించింది. ఆప్రాంతంలోని ఆదిమ తెగ నాయకుల ఆదేశాల అనంతరం వీటిని నిపుణులైన సాయుధులు హెలికాఫ్టర్ల ద్వారా కాల్చి చంపనున్నారు.

జంతు ప్రేమికుల ఆగ్రహం..

ఆస్ట్రేలియా ప్రభుత్వ నిర్ణయంపై జంతు ప్రేమికులు తీవ్ర ఆగ్రహం వ్యక్తం చేస్తున్నారు. ఇప్పటికే కార్చిచ్చు కారణంగా ఎన్నో వేల జంతువులు మృతిచెందాయని ఆవేదన వ్యక్తం చేశారు. ఇప్పడు వీటిని కూడా చంపడం ఎంత వరకు సమంజసమని ప్రశ్నిస్తున్నారు.

ఇదీ చూడండి: విమానం కూలడం ప్రమాదం కాదా? క్షిపణి దాడే కారణమా?