చైనా ఆటకట్టించేందుకు ఆస్ట్రేలియా భారీ పెట్టుబడులు

భారత్​తో సరిహద్దు సమస్య సహా.. ఇండో-పసిఫిక్​ ప్రాంతంలో దురాక్రమణలకు పాల్పడుతున్న చైనాను నిలువరించటానికి ఆస్ట్రేలియా చర్యలు చేపట్టింది. రక్షణ వ్యవస్థను బలోపేతం చేసేందుకు రానున్న దశాబ్ద కాలంలో 270 బిలియన్​ ఆస్ట్రేలియన్​ డాలర్లు పెట్టుబడులు పెట్టనున్నట్లు ప్రకటించింది. ఇండో పసిఫిక్​ ప్రాంతంలో భారత్​, జపాన్ వంటి దేశాలతో కలిసి పనిచేస్తామని తెలిపింది.

ప్రపంచ శక్తిగా ఎదగాలన్న లక్ష్యంతో చైనా చేస్తోన్న దురాక్రమణలను ఎదుర్కొనేందుకు ఆస్ట్రేలియా సన్నద్ధమవుతోంది. ఇండో-పసిఫిక్​ ప్రాంతంలో చైనా దూకుడుకు అడ్డుకట్ట వేయటం సహా.. ప్రాంతీయ భద్రతను కాపాడుకునే దిశగా దేశ రక్షణ సామర్థ్యాలను బలోపేతం చేయాలని నిర్ణయించింది. అందుకోసం వచ్చే దశాబ్ద కాలంలో రక్షణ వ్యవస్థలో 270 బిలియన్​ ఆస్ట్రేలియన్​ డాలర్లు పెట్టుబడులు పెట్టనున్నట్లు ప్రధానమంత్రి స్కాట్​ మోరిసన్​ ప్రకటించారు.

"ఇండో-పసిఫిక్​ ప్రాంతంలో ఎదురవుతోన్న సవాళ్లకు కొత్త విధానం కావాలి. మన ప్రయోజనాలకు విరుద్ధమైన చర్యలను నిరోధించడానికి అది ఉపయోగపడుతుంది. పెరుగుతున్న వ్యూహాత్మక పోటీకి, ఉద్రిక్తతలకు ఇండో పసిఫిక్​ కేంద్రంగా మారింది. ఇటీవల భారత్​-చైనా మధ్య సరిహద్దు సమస్య, దక్షిణ చైనా సముద్రం, తూర్పు చైనా సముద్రంలో సవాళ్లు వంటివి పెరిగాయి. ఈ ఇండో-పసిఫిక్​ ప్రాంతంలో భారత్​, జపాన్​, ఇండోనేషియా వంటి దేశాలతో కలిసి పని చేస్తూ.. ఆస్ట్రేలియా ముఖ్యపాత్ర పోషిస్తోంది."

- స్కాట్​ మోరిసన్​, ఆస్ట్రేలియా ప్రధాన మంత్రి.

270 బిలియన్​ ఆస్ట్రేలియా డాలర్ల(186.7 బిలియన్​ అమెరికా డాలర్లు) పెట్టుబడులను.. వైమానిక, నేవీ, ఉపరితల భద్రత వ్యవస్థల బలోపేతం కోసం ఉపయోగించనున్నట్లు చెప్పారు ప్రధాని. ఈ నిధుల్లో 800 మిలియన్​ డాలర్లు సముద్రం నుంచి ప్రయోగించే అత్యాధునిక క్షిపణి వ్యవస్థ​ ఏడీఎం-158సి అమెరికా నుంచి కొనుగోలు చేయటం, హైపర్​ సోనిక్​ ఆయుధాల అభివృద్ధికి 9 బిలియన్​ డాలర్లు, 800 మంది రక్షణ సిబ్బంది నియామకానికి మిగతా నిధులను వ్యయం చేయనున్నట్లు తెలిపారు. రక్షణ వ్యవస్థలో కొత్త సామర్థ్యాలు తమ ప్రాంతంలో బలమైన శక్తిగా ఎదిగేందుకు ఉపకరిస్తాయని ఆశాభావం వ్యక్తం చేశారు మోరిసన్​.

ఇదీ చూడండి: ఆస్ట్రేలియాపై భారీగా సైబర్‌ దాడులు- ఆ దేశం పనే!