అఫ్గాన్​లో తాలిబన్ల మారణహోమం- 23 మంది బలి

అఫ్గానిస్థాన్​లో తాలిబన్లు మరో ఘాతుకానికి పాల్పడ్డారు. ప్రభుత్వ చెక్​పోస్టులను లక్ష్యంగా చేసుకొని భీకర కాల్పులు జరిపారు. ఈ దాడిలో 9 మంది సైనికులు మరణించారు. మరోవైపు.. పర్వాన్​ రాష్ట్రంలో గుర్తుతెలియని వ్యక్తులు మసీదుల్లోకి చొరబడి కాల్పులకు తెగబడ్డారు. ఈ ఘటనలో 14 మంది అమాయకులు బలయ్యారు.

అఫ్గాన్​లో హింస నిత్యకృత్యం అయిపోయింది. ఇవాళ జరిగిన మూడు వేర్వేరు ఘటనల్లో మొత్తం 23 మంది ప్రాణాలు కోల్పోయారు. 9 మంది సైనికులతో పాటు 14 మంది అమాయకులు బలయ్యారు.

చెక్​పోస్ట్​పై దాడి

తఖార్ రాష్ట్రాం ఖ్వాజా బహుద్దీన్​ జిల్లాలోని ప్రభుత్వ అనుకూల చెక్​పోస్టులను లక్ష్యంగా చేసుకొని తాలిబన్లు కాల్పులకు తెగబడ్డారు. ఈ దాడిలో 9 మంది సైనికులు మరణించారు. మరో ఆరుగురు గాయపడినట్లు అధికారులు తెలిపారు.

మసీదులోకి చొరబడి

అఫ్గాన్​లోని పర్వాన్​ రాష్ట్రంలో గుర్తుతెలియని వ్యక్తులు మసీదులోకి చొరబడి కాల్పులు జరిపినట్లు అధికారులు వెల్లడించారు. ఈ ఘటనలో 11 మంది అమాయకులు బలైనట్లు వెల్లడించారు. మసీదు నుంచి ప్రార్థనలు ముగించుకొని ఇంటికి వస్తున్న ఓ కుటుంబంపై దాడి చేసి.. మరో ముగ్గురిని హత్య చేసినట్లు పేర్కొన్నారు.

ఈ దాడులకు ఇంతవరకు ఎవరూ బాధ్యత ప్రకటించుకోలేదు. అయితే ఈ ఘటనల వెనక తాలిబన్ల హస్తం ఉండొచ్చని అధికారులు చెబుతున్నారు.

అఫ్గానిస్థాన్​లో హింసను తక్షణమే అరికట్టాలని ఇటీవలే ఐక్యరాజ్య సమితి పిలుపునిచ్చిన నేపథ్యంలో ఈ దాడులు జరగడం గమనార్హం.

చర్చలకు ఆశ చిగురించేనా..

అఫ్గాన్​లో నెలకొన్న హింసను నిర్మూలించాలని ఐరాసతో పాటు, అమెరికా కూడా పిలుపునిచ్చింది. తాలిబన్​లతో మరోసారి చర్చలు జరపాలని కోరింది అమెరికా. హింసను వెంటనే తగ్గించేలా చర్యలు తీసుకోవాలని పేర్కొంది.

అఫ్గాన్​ అధ్యక్షుడు అష్రఫ్​ ఘనీ, ప్రత్యర్థి అబ్దుల్లా అబ్దుల్లా మధ్య ఆదివారం అధికార భాగస్వామ్య ఒప్పందం కుదిరింది. ఈ నేపథ్యంలో అఫ్గాన్ నేతలు, తాలిబన్ల మధ్య త్వరలోనే చర్చలు జరిగే అవకాశాలు ఉన్నట్లు విశ్లేషకులు అంచనా వేస్తున్నారు.