అఫ్గాన్​​లో బాంబుదాడులు- 10 మంది మృతి

అఫ్గానిస్థాన్​ రాజధాని కాబూల్​లో మూడు చోట్లు బాంబుదాడులు జరిగాయి. ఈ మారణకాండలో 10 మంది మరణించగా, 41 మంది తీవ్రంగా గాయపడ్డారు. ఈ దుశ్చర్యకు తమదే బాధ్యతని తాలిబన్లు ప్రకటించారు.

అఫ్గానిస్థాన్​ రాజధాని కాబూల్​ బాంబు దాడులతో రక్తమోడింది. మూడు వేర్వేరు చోట్ల జరిగిన ఈ దాడుల్లో 10 మంది ప్రాణాలు కోల్పోయారు. మృతుల్లో ఐదుగురు మహిళలు, ఓ చిన్నారి ఉన్నారు. మరో 41 మంది గాయపడ్డారు.

యూఎస్​ జాయింట్ చీఫ్స్​ ఆఫ్​ స్టాఫ్​ ఛైర్మన్​ మెరైన్​ జనరల్​ జోసెఫ్​ డన్​ఫోర్డ్​... అఫ్గానిస్థాన్​ అధ్యక్షుడు అష్రఫ్​ ఘనీని కలవడానికి రాజధాని సందర్శిస్తున్న సమయంలోనే ఈ దాడులు జరిగాయని అధ్యక్ష కార్యాలయం ప్రకటించింది.

దాడులు ఇలా జరిగాయ్..

తొలుత గనులశాఖ ఉద్యోగులు పయనిస్తున్న బస్సును లక్ష్యం చేసుకుని.. ద్విచక్రంవాహనంపై వచ్చిన ఓ ఉగ్రవాది ఆత్మాహుతి దాడికి పాల్పడ్డాడు. అనంతరం అంతర్జాతీయ కూటమి దళాలే లక్ష్యంగా కారు బాంబు దాడి జరిగింది.

మూడో బాంబుదాడి... బస్సుదాడి జరిగిన ప్రదేశానికి సమీపంలోనే జరిగింది. అయితే ఇక్కడ ఎలాంటి ప్రాణనష్టం సంభవించలేదని అధికారులు తెలిపారు.

మాదే బాధ్యత

ఈ మారణకాండకు బాధ్యత తమదేనని తాలిబన్లు ప్రకటించుకున్నారు. 18 సంవత్సరాల యుద్ధాన్ని ముగించే లక్ష్యంతో అమెరికాతో చర్చలు జరుపుతున్నప్పటికీ... భద్రతాదళాలను లక్ష్యంగా చేసుకుని తాలిబన్లు దాడులు కొనసాగిస్తూనే ఉన్నారు.

ఇదీ చూడండి: 'ట్రంప్ చేసింది చాలా పెద్ద తప్పు.. జాగ్రత్తగా ఉండాలి'