సోషల్ మీడియాలో యూట్యూబ్‌ ఒకటి. ఇందులో పాపులారిటీ కోసం చాలా మంది రకరకాల ప్రయత్నాలు చేస్తుంటారు. నెటిజన్లను ఆకట్టుకోవడం కోసం తమ సృజనాత్మకత వెలికితీసి, నానా కష్టాలుపడి వీడియోలు చేసి పెడుతుంటారు. కానీ ఇండొనేషియాకి చెందిన ఓ యువకుడు మాత్రం ఏం చేయకుండా కేవలం కెమెరా ముందు కూర్చొని బాగా పాపులర్‌ అయ్యాడు. ఇప్పుడు అక్కడి సోషల్‌మీడియాలో ఆ యువకుడి వీడియోలు, మీమ్స్‌ హల్‌చల్‌ చేస్తున్నాయి. అతడిలా వీడియోలు చేసేందుకు మరికొందరూ ప్రయత్నిస్తున్నారు.
2 గంటలపాటు స్తబ్ధంగా.!
చాలా మందిలాగే ఇండోనేషియాకు చెందిన మహ్మద్‌ దిదిత్‌ ఓ యూట్యూబర్‌. ఇతడు కూడా యువత కోసం ప్రత్యేకమైన వీడియోలు చేస్తుంటాడు. అయితే ఇటీవల ఏం చేయాలో తెలియక 2 గంటల పాటు కంప్యూటర్‌ కెమెరా ముందు ఖాళీగా కూర్చొని వీడియో రికార్డ్‌ చేశాడు. రికార్డింగ్‌ సమయంలో ముఖంలో ఎలాంటి హావభావాలు లేకుండా కనీసం కదలకుండా అలాగే కూర్చున్నాడు. అలా 2 గంటలు ఏం చేయకుండా తీసిన వీడియోను '2 అవర్స్‌ ఆఫ్‌ డూయింగ్‌ నథింగ్‌' పేరుతో యూట్యూబ్‌లో అప్‌లోడ్‌ చేశాడు. అంతే.. ఆ వీడియో తెగ పాపులర్‌ అయింది.