'భారత్​లో 9కోట్ల మందికి ఆ సౌకర్యాలు లేవు'

మధ్య, దక్షిణాసియాల్లోని పట్టణ ప్రాంతాల్లో నివసించే 15కోట్ల మందికిపైగా ప్రజలకు చేతులు శుభ్రపరుచుకునేందుకు కనీస సౌకర్యాలు లేవని పేర్కొంది యూనెసెఫ్‌. భారత్​లోని పట్టణాల్లో నివసించే 9కోట్ల మందికిపైగా ప్రజలకు ఇళ్లల్లో చేతులు కడుక్కునేందుకు నీరు, సబ్బు వంటివి అందుబాటులో లేవని 'అంతర్జాతీయ హ్యాండ్‌ వాష్‌ డే' సందర్భంగా పేర్కొంది.

భారత దేశంలోని పట్టణాల్లో నివసించేవారిలో సుమారు 9కోట్ల మందికి.. ఇళ్లల్లో చేతులు శుభ్రపరుచుకునేందుకు కనీస సౌకర్యాలు లేవని యూనిసెఫ్ పేర్కొంది​. ఈ మేరకు 'అంతర్జాతీయ హ్యాండ్‌ వాష్‌ డే' సందర్భంగా.. విడుదల చేసిన నివేదికలో వెల్లడించింది. కరోనా వేళ ఈ సమస్య మరింత పెరిగిందని తెలిపింది.

22శాతం మందికి..

మధ్య, దక్షిణ ఆసియా పట్టణాల్లో నివసించే 22శాతం మంది ప్రజలకు చేతులు కడుక్కునేందుకు సబ్బు, నీరు వంటి సదుపాయాలు అందుబాటులో లేవని యూనిసెఫ్​ నివేదిక స్పష్టం చేసింది. బంగ్లాదేశ్​లో సుమారు 2కోట్ల 90లక్షల మంది పట్టణ ప్రజలు కూడా ఈ సౌకర్యాలు లేక ఇబ్బందులు ఎదుర్కొంటున్నారని ప్రకటించింది. కరోనా వ్యాప్తి నేపథ్యంలో ప్రతి ఒక్కరూ చేతులు శుభ్రపరుచుకోవటం గుర్తుంచుకోవాలని, ఇది సామాజిక బాధ్యతని యూనెసెఫ్‌ ఇండియాకు ప్రాతినిధ్యం వహిస్తున్న డాక్టర్‌ యాస్మిన్‌ ఆలీ హక్‌ అన్నారు. లేని పక్షంలో కొవిడ్​ మరింత విజృంభిస్తుందని ఆయన హెచ్చరించారు. తరచూ చేతులు శుభ్రపరచుకోవడం ద్వారా కరోనాలాంటి మరెన్ని వైరస్​లను అడ్డుకోవచ్చని గుర్తుచేశారు యాస్మిన్​.

ఐదుగురిలో ముగ్గురికే..

ప్రపంచ వ్యాప్తంగా ప్రతి ఐదుగురు పిల్లల్లో ముగ్గురికి మాత్రమే చేతులు శుభ్రపరుచుకునే సౌకర్యాలు అందుబాటులో ఉన్నాయని.. పిల్లల హక్కుల నివేదిక వెల్లడిస్తోందని యూనెసెఫ్‌ తెలిపింది. అభివృద్ధి చెందిన దేశాల్లోనూ 10 పాఠశాలల్లో ఏడింటికి ఈ సౌకర్యాలు లేవని పేర్కొంది. విద్యార్థులకు చేతులు శుభ్రపరుచుకోవటం, సురక్షిత తాగునీటిని అందించటం వంటి సౌకర్యాలు కల్పించాలని యాస్మిన్​ కోరారు.

ఇదీ చదవండి:ఆ బ్లడ్​గ్రూప్​ వారికి కరోనా సోకే అవకాశం తక్కువే!