పాక్​ రైలు ప్రమాదంలో 74కు చేరిన మృతులు

పాకిస్థాన్​లో కరాచీ-రావల్పిండి తేజ్​గ్రామ్​ ఎక్స్​ప్రెస్ రైలు ప్రమాదంలో మృతుల సంఖ్య అంతకంతకూ పెరుగుతోంది. గ్యాస్​ సిలిండర్​ పేలి మంటలు చెలరేగిన ఘటనలో ఇప్పటివరకు 74 మంది మరణించారు. 40 మందికి తీవ్రగాయాలయ్యాయి. క్షతగాత్రుల పరిస్థితి విషమంగా ఉన్నందున మృతుల సంఖ్య మరింత పెరిగే అవకాశం ఉంది.

పాకిస్థాన్​లో జరిగిన ఘోర రైలు ప్రమాదంలో మృతుల సంఖ్య 74కు చేరింది. కరాచీ-రావల్పిండి తేజ్​గ్రామ్​ ఎక్స్​ప్రెస్​ వంటగదిలో అల్పాహారం తయారుచేస్తుండగా.. గ్యాస్​ సిలిండర్​ పేలి మంటలు చెలరేగిన ఘటనలో తాజాగా మరికొందరు ప్రాణాలు కోల్పోయారు. రహీం యార్​ ఖాన్ సమీపంలోని లియాఖత్​పుర్​ వద్ద ఈ ప్రమాదం జరిగింది. అగ్నిప్రమాదంతో పెద్ద ఎత్తున మంటలు చెలరేగాయి. రైలులోని మూడు కోచ్​లు పూర్తిగా దగ్ధమయ్యాయి. 10 అగ్నిమాపక యంత్రాలు ఉపయోగించి మంటలను అదుపులోకి తెచ్చారు. క్షతగాత్రులను సైనిక విమానాలలో ఆస్పత్రులకు తరలించారు. ప్రమాదంలో దాదాపు 40 మంది తీవ్రంగా గాయపడ్డారు.

సిలిండర్ల వల్లే పేలుడు:మంత్రి

క్షతగాత్రుల పరిస్థితి విషమంగా ఉన్నందున మృతుల సంఖ్య మరింత పెరిగే అవకాశం ఉందని అధికారులు తెలిపారు. బాధితుల్లో ఎక్కువ మంది ఇస్లాం మత భోదకులే ఉన్నట్లు అధికారులు తెలిపారు.

'ప్రమాద బాధితుల్లో చాలా వరకు ఇస్లాం భోదకులే ఉన్నారు. వారంతా లాహోర్​లోని ఓ కార్యక్రమంలో పాల్గొనడానికి వెళ్తున్నారు. గ్యాస్​ స్టవ్​లను ఉపయోగించి ప్రయాణికులు అల్పాహారం తయారు చేసుకుంటున్నారు. ఆ సమయంలో ఒక్కసారిగా రెండు స్టవ్​లు పేలి మంటలు చెలరేగాయి. రైలు వేగంగా వెళ్తున్నందున మంటలు అతి త్వరగా వ్యాపించాయి. ప్రయాణికులు పొయ్యి వాడొద్దని గార్డు హెచ్చరించారు. అయినా వారు వినకుండా సిలిండర్​ వినియోగించారు. మంటలు చెలరేగిన తర్వాత రైలు నుంచి కిందకు దూకడం వల్లే ఎక్కువ మంది మరణించారు.'
-షేక్ రషీద్ అహ్మద్​, పాకిస్థాన్ రైల్వే శాఖ మంత్రి

ఖండించిన ప్రయాణికులు

అయితే మంత్రి వ్యాఖ్యలను ఇస్లాం మత భోదకులు ఖండించారు. విద్యుదాఘాతం వల్లే పేలుడు సంభవించిందని ఆరోపించారు. రైలులో విద్యుత్​ తీగలు కాలుతున్న వాసన వచ్చిందని, దీంతో రైల్వే అధికారులను అప్రమత్తం చేశామని గాయపడ్డ ప్రయాణికులు చెప్పారు. అయినా అధికారులు తమ మాటను పట్టించుకోలేదన్నారు.

బాధితులకు పరిహారం

ఘటనపై సమగ్ర దర్యాప్తునకు పాక్​ ప్రధాని ఇమ్రాన్​ ఖాన్ ఆదేశించారు. అధికారుల నిర్లక్ష్యం వల్లే ప్రమాదం సంభవించిందని రైల్వే మంత్రి ఒప్పుకున్నారు. దీనిపై సమగ్ర విచారణ చేపడతామని తెలిపారు. మృతుల కుటుంబాలకు 15 లక్షలు, క్షతగాత్రులకు 5 లక్షల పరిహారం ప్రకటించారు.