పాక్​లో కాల్పులు- అధికార పార్టీ నేత సహా ముగ్గురు మృతి

పాకిస్థాన్ ఖైబర్ పక్తుంఖ్వా రాష్ట్రంలో దుండగులు జరిపిన కాల్పుల్లో అధికార పార్టీకి చెందిన నేత మరణించారు. అదే రాష్ట్రంలో జరిగిన మరో దాడిలో ముగ్గురు ప్రాణాలు కోల్పోయారు.

పాకిస్థాన్​లో మరోసారి కాల్పులు కలకలం సృష్టించాయి. రెండు వేరువేరు ఘటనల్లో మొత్తం నలుగురు ప్రాణాలు కోల్పోయారు. ఖైబర్ పక్తుంఖ్వా రాష్ట్రంలో జరిగిన కాల్పుల్లో ముగ్గురు మరణించారు. గుర్తు తెలియని దుండగులు జరిపిన ఈ కాల్పుల్లో ఆరుగురు గాయపడ్డారు.

పెషావర్​లోని మిచ్నీ రోడ్​లో ఓ కారుపై ఆకస్మికంగా దాడి చేశారు దుండగులు. ముహమ్మద్ అలీ అనే వ్యక్తితో పాటు అతని ఇద్దరు గన్​మెన్​లను కాల్చిచంపారు. ఈ క్రమంలో మరో ఆరుగురు గాయపడ్డారు.

హరిపుర్​ జిల్లాలో జరిగిన మరో దాడిలో అధికార తెహ్రీక్-ఈ-ఇన్సాఫ్​ పార్టీ రాష్ట్ర ఉపాధ్యక్షుడు తాహీర్ ఇక్బాల్ హత్యకు గురయ్యారు. ఆయన ప్రయాణిస్తున్న కారుపై దుండగులు దాడి చేశారు. ఈ ఘటనలో ఇక్బాల్ ముగ్గురు స్నేహితులు గాయపడ్డారు.

ఈ దాడిపై ఖైబర్ పక్తుంఖ్వా ముఖ్యమంత్రి మెహ్ముద్ ఖాన్ విచారణకు ఆదేశించారు. ఘటనపై సమగ్ర నివేదిక అందించాలని రాష్ట్ర పోలీసు ముఖ్య అధికారికి ఆదేశాలు జారీ చేశారు.