జలాంతర్గామిలో మంటలు.. 14 మంది మృతి

రష్యా నావికాదళానికి చెందిన ఏఎస్‌-12 అణు జలాంతర్గామిలో మంటలు చెలరేగాయి. ఘటనలో 14 మంది నౌకాదళ సిబ్బంది మృతిచెందారు. ఈ విషయాన్ని రష్యా రక్షణ​ మంత్రిత్వ శాఖ మంగళవారం అధికారికంగా ప్రకటించింది. నావికాదళానికి జరిగిన మరో పెద్ద ముప్పుగా అభివర్ణించింది.

రష్యా సముద్రజలాల్లో విషాదం చోటుచేసుకుంది. ఆ దేశ నౌకాదళానికి చెందిన ఏఎస్​-12 అనే జలాంతర్గామి(సబ్​మెరైన్​)లో అగ్నిప్రమాదం జరిగింది. మంటల్లో వెలువడిన విష ఉద్ఘారాలకు ఊపిరాడక 14 మంది నావికులు మృతిచెందినట్లు రక్షణ మంత్రిత్వ శాఖ అధికారికంగా ధ్రువీకరించింది.

సన్నాహాల్లో భాగంగా రష్యా ఉత్తర భాగంలోని ఓ ప్రాంతంలో జలాంతర్గామి సాంకేతికతపై ప్రయోగాలు జరుపుతుండగా ఒక్కసారిగా మంటలు చెలరేగాయి. ప్రస్తుతం దీనిని సెవరోమార్స్క్​ మిలటరీ బేస్​కు తరలించారు.

రష్యా అధ్యక్షుడు వ్లాదిమిర్​ పుతిన్ ఘటనా స్థలాన్ని​ సందర్శించారు. ప్రమాదం గురించి అధికారులను అడిగి వివరాలను తెలుసుకున్నారు. రష్యా నౌకాదళం, సైన్యానికి ఈ ప్రమాదం తీరని నష్టం అని ఆవేదన వ్యక్తం చేశారు పుతిన్​. నావికాదళ అధ్యక్షుడి ఆధ్వర్యంలో ఘటనపై విచారణకు ఆదేశించారు.

గతంలోనూ...

2000 సంవత్సరంలోనూ కుర్స్క్​​ జలాంతర్గామి ఇలానే ప్రమాదవశాత్తు నీట మునిగింది. దాదాపు 118 మంది మృతిచెందారు. అప్పట్లో ఈ ఘటన యావత్​ దేశాన్ని దిగ్భ్రాంతికి గురిచేసింది. ప్రజా వ్యతిరేకతను ఎదుర్కోలేక ప్రధాని పుతిన్​ కొన్ని రోజుల పాటు సెలవుల్లో గడిపారు.

2008లోనూ జలాంతర్గామిలో మంటలు చెలరేగి ముగ్గురు నేవీ అధికారులు, 17 మంది ప్రజలు మృతిచెందారు. 2011లో రష్యాలోని అతిపెద్ద జలాంతర్గామి మంటలకు ఆహుతైంది. ముర్​మాన్స్​ ప్రాంతంలోని సముద్ర జలాల్లో మరమ్మతులు చేస్తుండగా ఈ ఘటన జరిగింది. తాజాగా జరిగిన ఈ ఘటన గత 20 ఏళ్లలో నాలుగో ప్రమాదం.