'భారత శాస్త్రవేత్తలు భేష్​.. వారి సాయం ఎనలేనిది'

కరోనా వ్యాక్సిన్​ తయారీలో భారత్​తో పాటు భారతీయ అమెరికన్లతో కలిసి పనిచేస్తున్నామని అమెరికా అధ్యక్షుడు డొనాల్డ్ ట్రంప్ తెలిపారు. భారతీయ శాస్త్రవేత్తలు గొప్ప వారని కితాబిచ్చారు. ఇలా ఒక అగ్రరాజ్య అధ్యక్షుడు భారతీయ అమెరికన్ల ప్రతిభను ప్రశంసించటం ఇదే మొదటి సారి.

ప్రపంచాన్ని వణికిస్తోన్న కరోనా వైరస్​కు వ్యాక్సిన్​ కనిపెట్టేందుకు భారత్​తో కలిసి పనిచేస్తున్నామని అమెరికా అధ్యక్షుడు డొనాల్డ్ ట్రంప్ తెలిపారు. ఈ ఏడాది చివరికల్లా వ్యాక్సిన్ అందుబాటులోకి వస్తుందని స్పష్టం చేశారు.

రోజువారీ మీడియా సమావేశంలో మాట్లాడిన ట్రంప్.. వ్యాక్సిన్ తయారీలో భాగం పంచుకున్న భారతీయ అమెరికన్లు గొప్ప శాస్త్రవేత్తలు, పరిశోధకులు అని కొనియాడారు.

"నేను ఈ మధ్యనే భారత్​కు వెళ్లాను. ఆ దేశంతో కలిసి పనిచేస్తున్నాం. అంతేకాదు అమెరికాలో భారతీయుల జనాభా భారీగా ఉంది. వాళ్లు వ్యాక్సిన్​ తయారీలోనూ భాగం పంచుకున్నారు. వాళ్లంతా గొప్ప శాస్త్రవేత్తలు, పరిశోధకులు. భారత్​ చాలా గొప్ప కృషి చేస్తోంది. వ్యాక్సిన్ అభివృద్ధిలో సహకరించుకుంటున్నాం. భారత్​తో కలిసి అదృశ్య శత్రువును చిత్తు చేస్తాం.

మీకు తెలుసు.. ప్రధాని మోదీ నాకు మంచి మిత్రుడు. భారత్​లోని మన స్నేహితులకు వెంటిలేటర్లు విరాళంగా ఇస్తున్నామని ప్రకటించడం గర్వంగా ఉంది. మనం భారత్​కు మద్దతుగా నిలవాలి."

- డొనాల్డ్ ట్రంప్, అమెరికా అధ్యక్షుడు

ఇదే తొలిసారి..

అమెరికాలోని జాతీయ ఆరోగ్య సంస్థతో సహా విశ్వవిద్యాలయాలు, పరిశోధన సంస్థలు, జీవ వైద్య అంకుర సంస్థల్లో భారీ సంఖ్యలో ఉన్న భారతీయులు కీలకంగా వ్యవహరిస్తున్నారు. భారతీయ అమెరికన్ల ప్రతిభకు సంబంధించి ఒక అమెరికా అధ్యక్షుడు ప్రశంసించటం ఇదే తొలిసారి.

మొదటి నుంచీ..

2016 అక్టోబర్​లో న్యూజెర్సీలో భారతీయ అమెరికన్ల కోసం ప్రత్యేక ర్యాలీని నిర్వహించిన మొదటి వ్యక్తి ట్రంప్ కావటం విశేషం. అప్పటి నుంచి శ్వేతసౌధంలో భారత్​తో పాటు భారతీయ అమెరికన్లకు తాను మంచి మిత్రుడని ట్రంప్ పలుమార్లు చెప్పారు.

అమెరికాలో 40 లక్షల మంది భారతీయులు ఉండగా.. ఇందులో 25 లక్షల మంది కీలక ఓటర్లు ఉన్నారు. ఈ ఏడాది నవంబర్​లో జరిగే అధ్యక్ష ఎన్నికల్లో వీరి ఓట్లు చాలా కీలకం కానున్నాయి.

ఇదీ చూడండి:'కరోనా వ్యాక్సిన్​ డేటాను చైనా దొంగిలిస్తుంది'