మంచు తుపానుకు టెక్సాస్​ గజగజ

అమెరికాలోని టెక్సాస్​లో మంచు తుపాను తీవ్రత కొనసాగుతోంది. గురువారం వరకు హిమపాతం తగ్గుముఖం పట్టే అవకాశం లేదని వాతావరణ శాఖ అంచనా వేసింది. విద్యుత్ పునరుద్ధరణకు మరింత సమయం పడుతుందని అధికారులు వెల్లడించారు.

మంచు తుపాను అమెరికాలోని టెక్సాస్​ రాష్ట్రాన్ని బెంబేలెత్తిస్తోంది. ఎడతెరపి లేని హిమపాతానికి జనజీవనం స్తంభించింది. రాష్ట్రవ్యాప్తంగా 28 లక్షల మంది వినియోగదారులకు విద్యుత్ సరఫరా పూర్తిగా నిలిచిపోయింది. పలు ప్రాంతాల్లో పరిమితంగా విద్యుత్​ పంపిణీ జరుగుతోంది. బయటకు వెళ్లడమే గగనం కాగా... చాలా చోట్ల రోడ్లు నిర్మానుష్యంగా మారాయి. మంచు తుపాను ప్రభావం గురువారం వరకు ఉంటుందని వాతావరణ శాఖ అంచనా వేసింది.

మంచు దుప్పటిలో రహదారులు

నిర్మానుష్యంగా రోడ్లు..

ఈ పరిస్థితులను ఎదుర్కొనేందుకు అధ్యక్షుడు జో బైడెన్​ ఇప్పటికే హోం శాఖకు ఆదేశాలు జారీ చేశారు. యుద్ధ ప్రాతిపదికన చర్యలు చేపట్టాలన్నారు. అయితే విద్యుత్​ పునరుద్ధరణపై ఇంకా సందేహాలు వ్యక్తం అవుతున్నాయి. శీతల వాతావరణం కారణంగా సంస్థలు ఏ రకంగానూ విద్యుత్​ను ఉత్పత్తి చేయలేకపోతున్నాయని అధికారులు చెబుతున్నారు.

మంచు తీవ్రతకు రోడ్డుపై ఆగిపోతున్న వాహనాలు

యంత్రాల సాయంతో మంచు తొలగింపు

"విద్యుత్​ పునరుద్ధరణ త్వరగా జరుగుతుందని ఎవరూ ఆశించకండి. ప్రస్తుత పరిస్థితుల దృష్ట్యా మరింత సమయం పట్టే అవకాశం ఉంది. రాష్ట్రవ్యాప్తంగా విద్యుత్​ నిలిచిపోయే పరిస్థితి రాకూడదంటే అందరూ వీలైనంత వరకు విద్యుత్​ వినియోగానికి దూరంగా ఉండండి."

-సిల్వస్టర్​ టర్నర్​, హూస్టన్​ మేయర్​

తుపాను ప్రభావం కొవిడ్​ టీకా పంపిణీపైనా పడింది. హారిస్​ కౌంటీ సహా పలు ప్రాంతాల్లో విద్యుత్​ సరఫరా నిలిచిపోవడం వల్ల కొవిడ్​ టీకాలు పాడయ్యే ప్రమాదం ఉంది. నష్టనివారణపై అధికారులు తర్జనభర్జన పడుతున్నారు.

ఇదీ చదవండి :అమెరికాను బెంబేలెత్తిస్తున్న హిమపాతం