చైనా దూకుడుకు కళ్లెం వేస్తాం: బైడెన్​ సర్కార్​

అమెరికాకు గట్టి పోటీదారుగా ఎదుగుతున్న చైనాను ఎదుర్కొంటామని బైడెన్​ పాలనా యంత్రాంగం పేర్కొంది. తైవాన్​కు మద్దతుగా అమెరికా భద్రతా బలగాలు మెహరించడం, దక్షిణ సముద్రంలో అమెరికా సైన్యం ఉనికి పట్ల చైనా బుసలు కొడుతున్న నేపథ్యంలో ఈ మేరకు బైడెన్​ పాలనా యంత్రాంగం స్పందించినట్లు తెలుస్తోంది.

అమెరికాకు చైనా గట్టి పోటీదారు అని అంగీకరిస్తూ కీలక వ్యాఖ్యలు చేసింది బైడెన్​ సర్కార్​. చైనా దూకుడు, బలవంతపు చర్యలను ఎదుర్కొంటామని స్పష్టం చేసింది.

"అమెరికా కార్మికులను ఇబ్బందులకు గురి చేసేలా చైనా వ్యవహరిస్తుందని తెలుసు. సాంకేతికత రంగంలో అమెరికాను దెబ్బతీయడానికి.. అంతర్జాతీయ సంస్థల్లో అగ్రరాజ్యం జోక్యాన్ని తగ్గించడానికి చైనా ప్రయత్నిస్తుంది. ఆ దేశంలో మానవ హక్కుల ఉల్లంఘన.. చైనా దూకుడు వ్యవహరశైలికి అద్దం పడుతోంది. అందుకే చైనా దూకుడు, బలవంతపు చర్యలను కళ్లెం వేస్తాం. ఈ మేరకు ప్రధాన సైనిక ప్రయోజనాలను బలోపేతం చేస్తాం. ప్రజాస్వామ్య విలువలను కాపాడుకుంటాం. ఆధునిక సాంకేతిక పరిజ్ఞాన అభివృద్ధికి పెట్టుబడులు పెడతాం. భద్రతా భాగస్వామ్యాన్ని పునరుద్ధరిస్తాం "

- నెడ్​ ప్రైస్​, అమెరికా ప్రతినిధి

అమెరికా-చైనా బంధం ఇటీవల కాలంలో ఎన్నడూలేని స్థాయిలో దెబ్బతింది. వాణిజ్యం, కరోనా పుట్టుక, దక్షిణ చైనా సముద్రంలో సైన్యం కదలికలు, తైవాన్​లో మానవ హక్కుల ఉల్లంఘన వంటి విషయాల్లో ఇరు దేశాల మధ్య విభేదాలు నెలకొన్నాయి.

ఇదీ చూడండి:మయన్మార్​ ఎన్నికల్లో 'అక్రమాల'పై సైన్యం దర్యాప్తు