కరోనా మహమ్మారిపై చర్చే ప్రధాన అజెండాగా ప్రపంచ ఆరోగ్య సంస్థ(డబ్ల్యూహెచ్ఓ) అసెంబ్లీ నేడు ప్రారంభం కానుంది. వీడియో కాన్ఫరెన్స్ ద్వారా ప్రపంచ దేశాలు ఈ అంతర్జాతీయ సమావేశంలో పాల్గొననున్నాయి. అయితే కరోనా వైరస్పై అమెరికా-చైనా మధ్య నెలకొన్న ఉద్రిక్త పరిస్థితులు.. ఈ సమావేశంపై ప్రభావం చూపే అవకాశముందని పలువురు నిపుణులు అభిప్రాయపడుతున్నారు.
డబ్ల్యూహెచ్ఓ అసెంబ్లీ సహజంగా మూడు వారాలపాటు జరుగుతుంది. కానీ కరోనా సంక్షోభం వల్ల ఈసారి కేవలం రెండురోజులకే పరిమితమైంది. డబ్ల్యూహెచ్ఓను స్థాపించిన నాటి(1948) నుంచి ఈ సమావేశమే అత్యంత ముఖ్యమైనదని అన్నారు సంస్థ సారథి ఆథనామ్ టెడ్రోస్.
తీర్మానం గట్టెక్కేనా?
వైరస్పై పోరులో ప్రపంచ దేశాల సహకారానికి సంబంధించి ఐరోపా సమాఖ్య ఓ తీర్మానాన్ని ప్రతిపాదించింది. కరోనా సంక్షోభంలో అంతర్జాతీయంగా "నిష్పాక్షిక, స్వతంత్ర, సమగ్ర" స్పందన ఉండాలని అందులో పేర్కొంది. పరీక్షలు, వైద్య పరికరాలు, చికిత్స, భవిష్యత్తులో రూపొందించే వ్యాక్సిన్లను సమానంగా వినియోగించుకోవాలని సూచించింది. ఆమోదం పొందినట్టయితే.. డబ్ల్యూహెచ్ఓ చరిత్రలోనే ఎలాంటి వ్యతిరేకత లేకుండా గట్టెక్కిన తొలి తీర్మానంగా ఇది మిగిలిపోతుంది.
అయితే అమెరికా-చైనా మధ్య సంబంధాలు రోజురోజుకు బలహీనపడుతున్నాయి. వైరస్పై నిజాన్ని దాచడంలో చైనాకు డబ్ల్యూహెచ్ఓ సహాయం చేసిందని ఇప్పటికే అమెరికా అనేకసార్లు ఆరోపించింది. సంస్థకు నిధులను కూడా నిలిపివేశారు అగ్రరాజ్య అధ్యక్షుడు డొనాల్డ్ ట్రంప్. వీటి ప్రభావం ఈ తీర్మానంపైనా పడే అవకాశముంది.
ఎన్ని క్లిష్ట పరిస్థితులు తలెత్తినా.. తీర్మానం గట్టెక్కాలని ఇతర దేశాలు ఆశిస్తున్నాయి. వైరస్పై పోరుకు ఈ తీర్మానం ఎంతో ఉపయోగపడుతుందని భావిస్తున్నాయి.
