కరోనా రోగుల చికిత్స కోసం ఇప్పటి వరకు ఉపయోగిస్తూ వస్తున్న మలేరియా నివారణ ఔషధం 'హైడ్రాక్సీక్లోరోక్విన్'పై... ట్రయల్స్ను నిలిపివేస్తున్నట్లు ప్రపంచ ఆరోగ్య సంస్థ (డబ్ల్యూహెచ్ఓ) తెలిపింది.
"హెచ్ఐవీ/ఎయిడ్స్ చికిత్సకు ఉపయోగించే ఔషధాలైన లోపినావిర్/ రిటోవినార్, అలాగే హైడ్రాక్సీక్లోరోక్విన్లపై... ట్రయల్స్ నిలివేయాలని పర్యవేక్షణ కమిటీ చేసిన సిఫార్సులను ఆమోదించాం."
- ప్రపంచ ఆరోగ్య సంస్థ
మరణాలు తగ్గించలేకపోయాయ్
హైడ్రాక్సీక్లోరోక్విన్ వల్ల కరోనా రోగులకు నయమవుతుందా? లేదా? అనేదానిపై విచారణ ముగించినట్లు డబ్ల్యూహెచ్ఓ స్పష్టం చేసింది. మిగతా మందులతో పోల్చి చూసినప్పుడు వీటి పనితీరు ఏమంత గొప్పగా లేదని స్పష్టం చేసింది. ఈ ఔషధాలు వైరస్ ప్రభావాన్ని కానీ, మరణాలను కానీ తగ్గించలేకపోయాయని వెల్లడించింది.
అందుకు ఆధారం లేదు
హైడ్రాక్సీక్లోరోక్విన్తో చికిత్స పొందిన రోగుల్లో మరణాలు పెరిగినట్లు ఎలాంటి ఆధారాలు లేవని డబ్ల్యూహెచ్ఓ పేర్కొంది. అయితే కొంతమేరకు కొవిడ్ రోగులు కోలుకోవడానికి సహాయపడినట్లు కొన్ని ట్రయల్స్లో నిరూపితమైందని వెల్లడించింది.
హైడ్రాక్సీక్లోరోక్విన్ ట్రయల్స్కు ముగింపు పలుకుతున్నట్లు తాము చేసిన ప్రకటన వల్ల... ఆసుపత్రుల్లో ఉంటూ ఇప్పటి వరకు ఆ మందులు తీసుకుంటున్న రోగులకుగానీ, ఇళ్లలోనే ఉంటూ ఔషధం తీసుకుంటున్నవారికి గానీ ఎలాంటి ఇబ్బంది ఉండదని ప్రపంచ ఆరోగ్య సంస్థ స్పష్టం చేసింది.
ఇదీ చూడండి:రికార్డ్: ఒక్కరోజులో 24 వేల 850 కేసులు, 613 మరణాలు
