శ్వేతసౌధం మీడియా కార్యదర్శికి కరోనా

శ్వేతసౌధంలో కరోనా కల్లోలం కొనసాగుతోంది. మీడియా కార్యదర్శి కేలీ మెకెననీకి తాజాగా పాజిటివ్ నిర్ధరణ అయ్యింది. ట్రంప్​ దంపతుల తర్వాత శ్వేతసౌధంలో కరోనా బారిన పడ్డ ఉన్నత ర్యాంకు అధికారుల్లో మెకెననీ ఒకరు.

అమెరికా అధ్యక్ష భవనాన్ని కరోనా చుట్టేస్తోంది. తాజాగా శ్వేతసౌధం మీడియా కార్యదర్శి కెేలీ మెకెననీకీ కొవిడ్​ నిర్ధరణ అయ్యింది. దీంతో వెంటనే క్వారంటైన్​లోకి వెళ్తున్నట్లు ఆమె తెలిపారు.

" ప్రస్తుత ఎన్నికల సమయంలో ప్రజలకు సమాచారం అందించాల్సిన అవసరం ఉంది. క్వారంటైన్​లో ఉంటూ అమెరికా ప్రజల కోసం పనిచేస్తా"

-కేలీ మెకెననీ.

లక్షణాలు లేకపోయినా సోమవారం నిర్వహించిన పరీక్షల్లో తనకు కొవిడ్​ నిర్ధరణ అయ్యిందని కేలీ తెలిపారు. అయితే ప్రెస్​ విభాగంలోని ఉద్యోగులకు మాత్రం నెగిటివ్ వచ్చిందని స్పష్టం చేశారు. కేలీ త్వరగా కోలుకోవాలని శ్వేతసౌధం ఓ ప్రకటనలో తెలిపింది.