'కరోనా క్లస్టర్లుగా మారిన అమెరికా యూనివర్సిటీలు'

సెమిస్టర్ పరీక్షల కోసం తెరిచిన యూనివర్సిటీలే కరోనా క్లస్టర్లుగా మారుతుండటం అమెరికాకు మరో తలనొప్పిగా మారింది. ఆఫ్​ క్యాంపస్ పార్టీలు, నైట్ క్లబ్​లలో యువత మాస్కులు ధరించకుండా గుమిగూడుతుండటం వల్ల కొత్త క్లస్టర్లు పెరుగుతున్నాయని అధికారులు ఆందోళన చెందుతున్నారు.

కరోనా కారణంగా ఇప్పటికే అనేక సమస్యలు ఎదుర్కొంటున్న అమెరికాలో కొత్తగా వైరస్ క్లస్టర్లు పెరుగుతుండటం ఆందోళనకు గురి చేస్తోంది. సెమిస్టర్ పరీక్షల కోసం తెరిచిన యూనివర్సిటీలే వైరస్​ వ్యాప్తికి కేంద్ర బిందువులుగా మారుతున్నాయి. ఉత్తర కరోలినాలోని హాస్టళ్లు, నోట్రీ డేమ్​లోని వసతి గృహాలను కొత్తగా వైరస్ క్లస్టర్లుగా గుర్తించారు యూనివర్సిటీ అధికారులు.

వీకెండ్​ పార్టీలు, నైట్ క్లబ్​లలో విద్యార్థులు మాస్కులు ధరించకుండా, భౌతిక దూరం పాటించకుండా తిరుగుతుండటం వల్ల ఆఫ్ క్యాంపస్​లలోనూ వైరస్ క్లస్టర్లు పెరిగిపోతున్నాయి. ఓక్లహామాలో జరిగిన ఓ పార్టీకి సంబంధించిన వీడియోలో విద్యార్థులు మాస్కులు లేకుండా భారీ సంఖ్యలో గుమిగూడిన దృశ్యాలు వైరల్ అయ్యాయి. అక్కడ 23 కేసులు నమోదయ్యాయి. ఆ ప్రాంతంలో ఉన్న విద్యార్థులను ఐసోలేషన్​లో ఉంచారు యూనివర్సిటీ అధికారులు.

ఇలా అయితే కష్టమే..

ఇలా జరుగుతుండటం పట్ల తీవ్ర అసంతృప్తి వ్యక్తం చేశాడు ఓ న్యూజెర్సీ విద్యార్థి. యూనివర్సిటీలో ఉదయం నుంచి అధ్యాపకులతో మాట్లాడటం, తరగతి గదిలో చాలా మందితో కలిసి కూర్చోవాల్సి వస్తోందని తెలిపాడు. దీని వల్ల కరోనాపై పోరాటం కొనసాగించలేమనే అభిప్రాయం వ్యక్తపరిచాడు.

వాషింగ్టన్, కాలిఫోర్నియా, మిస్సిసిప్పీలోని పాఠశాలల్లో వైరస్ వ్యాప్తిని నిలువరించడం అధికారులకు సవాల్​గా మారింది. తరగతి గదులను క్యాంపస్​లో నిర్వహించే విషయాన్ని పునః​సమీక్షిస్తున్నారు.

విద్యార్థులు పార్టీలు, క్లబ్బులకు వెళ్లవద్దని యూనివర్సిటీ అధికారులు హెచ్చరిస్తున్నారు.

కరోనా మహమ్మారి కారణంగా ప్రపంచంలోనే అత్యంత తీవ్రంగా ప్రభావితమైంది అమెరికా. ఇప్పటివరకు ఆ దేశంలో 56 లక్షలకు పైగా కేసులు నమోదు కాగా.. రికార్డు స్థాయిలో లక్షా 73వేల మంది మరణించారు.