లీగల్ ఓట్లు లెక్కిస్తే విజయం తమదేనని అమెరికా అధ్యక్షుడు డొనాల్డ్ ట్రంప్ ప్రకటించారు. ఎన్నికల ఫలితాలు వెలువడుతుండగానే తనదే విజయం అని బుధవారం ప్రకటించుకున్న తర్వాత తొలిసారి శుక్రవారం మీడియా ముందుకు వచ్చారు. ఈ సందర్భంగా ఎన్నికల ప్రక్రియ, మెయిల్‌-ఇన్‌-బ్యాలెట్‌ పద్ధతి, ప్రత్యర్థి డెమొక్రాటిక్‌ పార్టీపై తీవ్ర విమర్శలు గుప్పించారు.
తనని రెండోసారి అధికారంలోకి రానివ్వకుండా పెద్ద కుట్రే జరుగుతోందని ఆరోపించారు. మీడియా, ఎన్నికల అధికారులు డెమొక్రాట్లతో కుమ్మక్కయ్యారన్నారు.
"మీరు లీగల్ ఓట్లు లెక్కిస్తే నేను సులభంగా విజయం సాధిస్తా. పెద్ద పెద్ద సాంకేతిక, మీడియా సంస్థలు జోక్యం చేసుకున్నప్పటికీ.. నిర్ణయాత్మక రాష్ట్రాల్లో నేనే విజయం సాధించాను. డెమొక్రాట్ల హవా నడుస్తోందన్నారు. కానీ, ఎక్కడా అది కనిపించలేదు. మొత్తం మా రిపబ్లికన్ల గాలే వీచింది. సెనేట్‌లో పట్టు నిలుపుకున్నాం. ఈ సారి ఎక్కవ మంది రిపబ్లికన్‌ మహిళలు కాంగ్రెస్‌కు ఎన్నికయ్యారు."
- డొనాల్డ్ ట్రంప్, అమెరికా అధ్యక్షుడు