"భారత్​కు ఆ సత్తా ఉంది"

భారత్​లోని ఉగ్రవాద నిర్మూలనకు ఇతర దేశాల మద్దతు అవసరం లేదని, తమ దేశానికి ఆ సామర్థ్యం ఉందని ఉపరాష్ట్రపతి వెంకయ్య నాయుడు అన్నారు. పరాగ్వే పర్యటనలో భాగంగా ప్రవాస భారతీయులను ఉద్దేశించి ఆయన ప్రసంగించారు. ప్రపంచవ్యాప్తంగా ఉన్న ఉగ్రవాదంపై దేశాలన్నీ  కలిసికట్టుగా పోరాడాలని పిలుపునిచ్చారు.

పరాగ్వే పర్యటనలో భాగంగా అక్కడి ప్రవాస భారతీయులతో సమావేశమయ్యారు ఉపరాష్ట్రపతి వెంకయ్యనాయుడు. ఉగ్రవాదం మానవాళికి ప్రధాన శత్రువునని అన్నారు. దానిని సమూలంగా నిర్మూలించాల్సిన అవసరం ఉందన్నారు. భారత్​లో ఉగ్రవాద నిర్మూలనకు ఎలాంటి మద్దతు అవసరం లేదని, తమ దేశానికి ఆ సామర్థ్యం ఉందని స్పష్టం చేశారు.

" ఉగ్రవాదం మానవాళికి ప్రధాన శత్రువు. దానికి మతం లేదు. అది పిచ్చి, ఉన్మాద చర్య. భూమిపై నుంచి దానిని సమూలంగా తొలగించాలి. అంతర్జాతీయ సమాజం కలిసికట్టుగా పోరాడినప్పుడే అది సాధ్యం. భారత్​లోని ఉగ్రవాదంపై పోరుకు ఎలాంటి మద్దతు అవసరం లేదు. భారత్​కు ఆ సామర్థ్యం ఉంది. ఇటీవలే అది నిరూపితమైంది. పుల్వామా ఉగ్రదాడికి బదులు తీర్చుకున్నాం. పాక్​ సైన్యంపై భారత వైమానికదళం దాడి చేయలేదు. ఒక్క పౌరునికి హానీ చేయలేదు. కచ్చితమైన లక్ష్యంపైనే దాడి చేశారు." -వెంకయ్య నాయుడు, భారత ఉపరాష్ట్రపతి

వివాదంపై విచారం

ఉగ్రవాద శిబిరాలను ధ్వంసం చేసి... పుల్వామా ఉగ్రదాడికి దీటైన జవాబు చెప్పామన్నారు వెంకయ్య. వాయుసేన దాడుల్లో హతమైన ఉగ్రవాదుల సంఖ్యపై కొందరు వివాదం చేస్తున్నారని, ఇది సరికాదన్నారు. ఎవరికైనా అనుమానాలుంటే పాకిస్థాన్​కి వెళ్లి ఆ​ ప్రభుత్వాన్ని విచారించుకోవాలని భారత హోంమంత్రి తెలిపారని గుర్తుచేశారు.

పాక్​పై పరోక్షంగా..

పొరుగుదేశాలతో భారత్​ మంచి సంబంధాలు కోరుకుంటోందన్నారు వెంకయ్య. పొరుగుదేశాల్లోని ఓ దేశం ఉగ్రవాదాన్ని పెంచి పోషిస్తోందని పాకిస్థాన్​పై పరోక్షంగా విమర్శలు చేశారు. ఉగ్రవాద శిక్షణకు ఆ దేశం ఆర్థికంగా సహకరిస్తోందని, ఆశ్రయం కల్పిస్తోందని ఆగ్రహం వ్యక్తం చేశారు.