అంధకారంలో వెనిజువెలా

గ్రిడ్​ వ్యవస్థ కుప్పకూలి... వెనిజువెలాలో అంధకారం అలుముకుంది. ప్రజా జీవనం స్తంభించింది. మదురో ప్రభుత్వం మాత్రం ఇది ముమ్మాటికీ అమెరికా కుట్రేనని ఆరోపిస్తోంది.

తీవ్ర రాజకీయ సంక్షోభంలో కొట్టుమిట్టాడుతున్న వెనిజువెలాను మరో సమస్య చుట్టుముట్టింది. శుక్రవారం వెనిజువెలా అంధకారంలో మునిగిపోయింది. విద్యుత్​ సరఫరా నిలిచిపోయిఈ పరిస్థితి దాపురించింది. గడిచిన కొన్ని సంవత్సరాల్లో ఇదే అతి పెద్ద విద్యుత్​ కోత.

దేశం మొత్తం:

దేశంలోని మొత్తం 23 రాష్ట్రాల్లో 22 రాష్ట్రాలు అంధకారంలో మునిగిపోయాయి. రాజధాని కరాకస్​లోనూ విద్యుత్​ అంతరాయం కలిగింది. గ్రిడ్​ పై భారం అధికమైఒక్కసారిగా సరఫరా వ్యవస్థ కుప్పకూలింది.

స్తంభించిన రవాణా:

వెనిజువెలాలో ముఖ్య రవాణ వ్యవస్థ సబ్​వే. ఈ సబ్​వేలు విద్యుత్​ ఆధారంగా పనిచేస్తాయి. విద్యుత్​ సరఫరాకు ఆటంకం ఏర్పడి... సబ్​వే సేవలు నిలిచిపోయాయి. వేల మంది ప్రజలు రోడ్లపైకి వచ్చారు. ట్రాఫిక్​ సిగ్నల్స్​ పనిచేయక గందరగోళం ఏర్పడింది. వేలసంఖ్యలో కార్లు రోడ్లపై నిలిచిపోయాయి. విధి లేని పరిస్థితుల్లో కొంత మంది కాలినడకన ఇళ్లకు చేరుకున్నారు.

చీకట్లోనే వైద్యం:

విద్యుత్​ కోతప్రభావం ఆరోగ్య సేవలపైనా పడింది. రాజధాని కరాకస్​లోని ప్రముఖ ఆసుపత్రి అవిలా క్లినిక్​లోని ప్రసవ వార్డులో కొవ్వొత్తుల సహాయంతో వైద్యం చేస్తున్నారు.

అగ్రరాజ్యం కుట్రే:

వెనిజువెలా ప్రభుత్వం మాత్రం ఇది ముమ్మాటికీ అగ్రరాజ్యం కుట్రేనని అంటోంది. అమెరికా తమపై విద్యుత్​ యుద్ధం చేస్తోందని వెనిజువెలా ప్రభుత్వం ఆరోపించింది.

ఆ సెనేటర్​దే కీలక పాత్ర:

సమాచార మంత్రి జార్జ్​ రోడ్రిగ్జ్​ మితవాదపక్ష తీవ్రవాదులు దేశంలో అల్లర్లు సృష్టించడానికి ఫ్లోరిడా రిపబ్లికన్​ సేనేటర్​ మార్కో రుబియె నుంచి డబ్బులు తీసుకున్నారని తీవ్ర ఆరోపణలు చేశారు. ఈ కుట్ర వెనుక మార్కో రుబియె ఉన్నారని ఆయన ఆరోపించారు.

దేశ ప్రజలు కొంత కాలం సహనంతో ఉండాలని మంత్రి కోరారు. పరిస్థితి చక్కబడే వరకు ఇళ్లలోనే ఉండాలని సూచించారు. ఒక్క విద్యుత్​ సమస్యే కాదు. ఆహారం, మందుల కొరత ముంచుకొస్తోంది.

నా ఫోన్​లో తప్పు బటన్​ వల్లే సమస్య అంతా..

వెనిజువెలా ప్రభుత్వ ఆరోపణలపై స్పందించారు ఫోర్లిడా సెనేటర్​ రుబియె ట్విటర్​లో స్పందించారు.

" వెనిజువెలా ప్రజలారా నన్ను క్షమించండి. నా ఆపిల్​ ఫోన్లో​ ఎలక్ట్రానిక్​ వార్​ యాప్​లో తప్పు బటన్​ నొక్కడం వల్లే మీ దేశంలో విద్యుత్​ సరఫరా నిలిచిపోయింది" అంటూ ట్వీట్ లో ఎగతాళి చేశారు.