జైలుకెళ్లాలన్న 'వందేళ్ల బామ్మ' కల పుట్టినరోజున తీరింది!

పుట్టినరోజు వచ్చిందంటే చాలు.. ఆ రోజంతా ఆనందంగా గడపాలని కోరుకుంటారు. అందుకోసం ఏ గుడికో, ఇతర చారిత్రక ప్రదేశాలకో వెళ్లాలనుకుంటారు. కానీ.. ఓ అమెరికన్​ వృద్ధురాలు జైలుకెళ్లి.. సరదాగా ఖైదుగా మారింది. ఇంతకీ ఆమె ఎందుకలా చేసిందో తెలుసుకోవాలంటే ఈ వార్త చదవాల్సిందే.!

పుట్టినరోజునాడు ప్రతి ఒక్కరూ తమ కోరికల జాబితాలోని ఏదో ఒకదానిని నేరవేర్చుకుంటుంటారు. కొందరు విదేశాలకు వెళ్తే.. మరికొందరు తమకు ఇష్టమైన గుడికో, లేక నచ్చిన ప్రాంతానికో వెళ్తుంటారు. అయితే ఇందుకు భిన్నంగా ఆలోచించింది అమెరికా- రోక్స్​బోరోకు చెందిన వందేళ్ల బ్రయాంట్​ అనే వృద్ధురాలు. కారాగారంలో ఖైదీగా ఉండాలన్న తన కలను 100వ పుట్టినరోజు సందర్భంగా నెరవేర్చుకుంది ఈ బామ్మ. పర్సన్​ కౌంటీ అధికారుల సాయంతో బ్రయాంట్​ కల నెరవేరింది.

చేతులకు బేడీలతో...

బ్రయంట్​ కోరిక ప్రకారం.. ఆమెను ఇంటి నుంచి చేతులకు బేడీలు వేసి ఖైదీలను తీసుకెళ్లినట్లుగానే కార్లో ఎక్కించి తీసుకెళ్లారు ఇద్దరు అధికారులు. పోలీసుల వాహనంలో తీసుకెళ్లేటప్పుడు రహదారి వెంట సైరన్​ను కూడా మోగించారు.

అయితే... తన కల నెరవేరుతున్న ఆనందంలో బ్రయాంట్​ పోలీసులతో సరదాగా కవ్వింపు చర్యలకు పాల్పడింది. మాతో గొడవ పడొద్దని అధికారులు చెబుతున్నా.. ఓ పోలీసును సరదాగా కాలితో తన్నింది. అందుకు స్పందించిన ఆ అధికారి తనకు ఒక మోకాలు సరిగా లేదని చెప్పాడు. అయితే తనకు రెండు మోకాళ్లు సరిగా లేవని ఛలోక్తి విసిరింది బ్రయాంట్​.

బ్రయాంట్​ హర్షం..

అలా జన్మదినం నాడు కాసేపు జైల్లో ఖైదీలా గడిపిన బ్రయాంట్​.. తనకు ఇదొక కొత్త అనుభూతిని ఇచ్చిందని ఆనందం వ్యక్తం చేసింది. అనంతరం బయటికొచ్చిన ఆమె... కేక్​ కట్​ చేసి తన 100వ పుట్టినరోజు వేడుకలు జరుపుకుంది.

ఇదీ చదవండి:ఆఫీసులు, స్కూళ్లు, యూనివర్సిటీల్లో ఇక అవి బంద్!