కర్తార్పుర్ నడవా ప్రారంభించడాన్ని అమెరికా స్వాగతించింది. పరస్పర ప్రయోజనాల కోసం భారత్-పాకిస్థాన్ దేశాలు కలిసి పనిచేయడానికి ఇది తోడ్పడుతుందని పేర్కొంది.
పాకిస్థాన్ ప్రధాని ఇమ్రాన్ ఖాన్ చరిత్రాత్మక కర్తార్పుర్ నడవాను శనివారం అధికారికంగా ప్రారంభించారు. భారతీయ సిక్కు భక్తులకు వీసాలేకుండానే దర్శనానికి వెసులుబాటు కల్పిస్తున్నట్లు తెలిపారు. ప్రధాని నరేంద్ర మోదీ భారత్లో కర్తార్పూర్ నడవా ప్రారంభోత్సవ వేడుకల్లో పాల్గొన్నారు.
సిక్కు మత స్థాపకులు గురునానక్‌ 550వ జయంతి సందర్భంగా సిక్కుల చిరకాల స్వప్నం నెరవేరుస్తూ కర్తార్పూర్ కారిడార్‌ శనివారం తెరుచుకుంది. తొలి బ్యాచ్‌ ప్రయాణీకులకు పాక్ ప్రధాని స్వాగతం పలికారు.
ఈ ఏడాదిలో జరిగిన పుల్వామా ఉగ్రదాడి, ఆర్టికల్ 370 రద్దు నేపథ్యంలో భారత్-పాక్ మధ్య ఉద్రిక్త వాతావరణం నెలకొంది. ఇరు దేశాలు సంయమనం పాటించాలని అమెరికా సూచించింది. భారత్-పాక్ కోరితే మధ్యవర్తిత్వం వహించి కశ్మీర్ సమస్యను పరిష్కరిస్తానని అగ్రరాజ్యం అధ్యక్షుడు డొనాల్డ్ ట్రంప్ అనేక మార్లు వెల్లడించారు.
ఇదీ చూడండి:'పారిస్' నుంచి వైదొలిగేందుకు అమెరికా ప్రక్రియ షురూ!